Astanadaǵy «Mega Silk Way» SOS ortalyǵynan 8 myń adam evakýatsııalandy
ASTANA. QazAqparat - Elordadaǵy «Mega Silk Way» saýda, oıyn-saýyq ortalyǵynda jospardan tys órtke qarsy oqý-jattyǵý ótti, dep habarlaıdy QazAqparat.
«Evakýatsııalaý jónindegi shtab bastyǵy baıandaǵandaı, 4 mınýt 37 sekýndtyń ishinde 8 myń adam qaýipsiz jerge shyǵaryldy. Nátıje kóńilimizden shyqty», - dedi MEGA Center Managment dırektorlar keńesiniń tóraǵasy Nurlan Smaǵulov.
Oqý-jattyǵý barysynda ortalyqtyń órt sóndirý komandasy men órt sóndiretin arnaıy kóliki tanystyryldy. Saýda ortalyǵynyń órtke qarsy bólimshesinde 16 adam bar. Olar ár aýysymda 4 adamnan jumys isteıdi. Ǵımarattyń ishinde jáne syrtynda 460 beınebaqylaý kamerasy ornatylǵan. Órt dabyly tolyqtaı ortalyq baqylaý pýnktinen basqarylady. 7 negizgi jáne 24 apat kezine arnalǵan esikter de saýda ortalyǵynyń tıisti qyzmetkerleriniń únemi baqylaýynda bolady.
Shara kezinde «Mega Silk Way» órt sóndirý komandasy Astana qalalyq tótenshe jaǵdaılar departamentiniń qyzmetkerlerimen birge kınozaldardyń birinen shyqqan órtke qarsy jumyla jumys istedi. Órtti sóndirý úshin saýda ortalyǵyndaǵy adamdar tolyǵymen ǵımarattan shyǵaryldy.
«Saǵat 11-00-de dabyl tústi. Bul jerge úsh órt sóndirý bóliminiń bólimshelerinen 13 tehnıka jóneltildi. Osy kórsetilim jattyǵýynyń qorytyndysynda azdy-kemdi kemshilik bar. Tolyqtaı alǵanda, saýda, oıyn-saýyq ortalyǵy qyzmetkerleriniń jumysyn jaqsy dep baǵalaımyn», - dedi QR ІІM Tótenshe jaǵdaılar komıtetiniń tóraǵasy Vladımır Bekker.
Aıta keterligi, «Mega Silk Way» saýda, oıyn-saýyq ortalǵynda órtke qarsy ahýalǵa resmı túrde tekserý júrgizý ár aıdyń 10 kúni júrgizilip otyrady.
