Astanadaǵy medıtsınalyq uıymdar qandaı kemshilikterge jıi jol beredi
Turǵyndar kóbine medıtsınalyq qyzmet sapasyna, qyzmetterdi kóp kútý jaǵdaılaryna, konsýltatıvtik-dıagnostıkalyq qyzmetterdiń qoljetimsizdigine (qural-jabdyqtardyń bolmaýy, kezekti kóp kútý, joldama bermeý, kadr jetispeý), medıtsınalyq kómek kórsetýden, aýrýhanaǵa jatqyzýdan bas tartý, t.b. shaǵymdanady. Olardyń kópshiligi, turǵyndarǵa medıtsınalyq kómek kórsetýdi durys uıymdastyrýǵa qatysty, ıaǵnı sol jerde medıtsına uıymdarynda sheshimin tabýy tıis máseleler.
«Protsesterdi tsıfrlandyrý adam faktorynyń yqpalyn barynsha azaıtady, jumysyn durys atqarmaıtyn qyzmet jetkizýshilerdiń jalǵan jazba toltyryp, kózboıaýshylyq jasaýyna múmkindik bere qoımaıdy, óıtkeni IT quraldaryn qoldaný medıtsınalyq uıym tarapynan árbir qadamdy, patsıentke qatysty árbir áreketti qaǵaz betine shyqpaı-aq elektrondy formatta qadaǵalaýǵa múmkindik beredi. Engizilgen aqparattyń durystyǵyn tekseretin formatty-logıkalyq baqylaýlar Qor sarapshylaryna kómekke keledi. Oryn alǵan kemshilikter sarapshylar tarapynan rastalǵannan keıin (nemese qabyldanbaǵannan keıin) ǵana medıtsınalyq uıymdarǵa aqy tólenedi», - dep habarlady fılıaldyń baspasóz qyzmetinen.
Búgingi kúni qor medıtsınalyq kómektiń sapasyn baǵalaý monıtorınginiń ártúrin, qajet bolsa medıtsınalyq uıymdarǵa bara otyryp, aǵymdaǵy nemese josparly, maqsatty, proaktıvti jáne jospardan tys monıtorıng júrgizedi. J ospardan tys monıtorıng keri baılanystyń resmı arnalary arqyly patsıentterdiń ózderinen túsken shaǵymdar men ótinishter negizinde ǵana arqyly júrgiziledi. Árbir osyndaı suraýdy Qor sarapshylary patsıenttiń tarıhyn tolyq taldaı otyryp jáne oǵan usynylatyn medıtsınalyq kómektiń sapasyn baǵalap, jeke tártippen qarap, pysyqtaıdy. Eger shaǵym negizdiligi dáleldense jáne medıtsınalyq uıym tarapynan burmalaýshylyqtar anyqtalsa, qor ekonomıkalyq yqpal etý sharalaryn qoldanady.
«Nur-Sultan qalasy boıynsha 2022 jyldyń 6 aıynda kórsetilgen medıtsınalyq qyzmet sapasy men kólemine júrgizilgen túrli monıtorıngter aıasynda 30 938 kemshilik (defekt) anyqtalyp, 778 mln 861 myń teńge alyndy. Onyń ishinde, tegin medıtsınalyq kepildendirilgen kómek kólemi (TMKKK) aıasynda 429 mln 570 myń teńge somasyna 3980 kemshilik anyqtaldy. Mindetti áleýmettik medıtsınalyq saqtandyrý (MÁMS) júıesinde 349 mln 291 myń teńge somasyna 26 796 kemshilik belgili boldy», - delingen habarlamada.
Sondaı-aq, qordyń Nur-Sultan qalasy boıynsha fılıalynyń medıtsınalyq qyzmet sapasy men kólemin monıtorıngileý bólimi jospardan tys monıtorıng boıynsha 106 qorytyndy jasaǵan, onyń 17-si negizdi shaǵym ekeni dáleldendi. Jospardan tys tekseris nátıjesinde alynǵan soma 7 mln 379 myń teńgeni qurady.
Aqparattyq júıelerden alynǵan málimetter boıynsha, josparly emdeýge jatqyzýdy kútý merzimi boıynsha ótken jyldyń sáıkes kezeńimen salystyrǵanda 1,5%-ǵa óskeni baıqalady.
«Ótken jylmen salystyrǵanda, 2022 jyly ota jasaý kórsetkishi 9,8%-ǵa ósti. Tek joǵary tehnologııalyq medıtsınalyq kómek qoldaný arqyly MÁMS boıynsha 10,2 mlrd teńge somasyna qosymsha 3 888 qyzmet kórsetildi. Kardıologııa boıynsha 1218 patsıent emdelgen, kardıohırýrgııalyq ota 649 patsıentke jasalsa (qan aınalymy júıesi aýrýlary - 1060), 223 adamǵa neırohırýrgııalyq ota, 92 patsıentke ortopedııalyq ota, nesep-jynys júıesi aýrýlary – 977, al 217 patsıentke as qorytý syrqattary boıynsha jasaldy», - dep jazdy baspasóz qyzmeti.
Ondaǵy málimetterge qaraǵanda, barlyǵy 28 972 patsıentke em júrgizilgen, onyń ishinde, bir jasqa deıingi balalar - 7453, 1-14 jastaǵy balalar - 19 622, 15-17 jas aralyǵyndaǵy jasóspirimder - 1697. 172 balaǵa joǵary tehnologııalyq medıtsınalyq kómek kórsetip, statsıonarda emdeldi.
0-28 kúndik 3 194 nárestege 1 mlrd 414 myń teńge somasyna medıtsınalyq kómek kórsetildi, onyń ishinde 171 balaǵa 241 mln 591 myń teńge somasyna, onyń ishinde 24 balaǵa 68 mln. 125 myń teńge somasyna joǵary tehnologııalyq medıtsınalyq kómek arqyly júrekke ota jasalyp, ońaltýdyń birinshi satysynan ótken. 17 balaǵa arnaıy medıtsınalyq kómek arqyly 31 mln 725 myń teńge somasyna ota jasaldy.
«Bizdiń sarapshylar medıtsınalyq qyzmettiń qoljetimdi bolýy jáne sapasynyń jaqsarýy úshin, ıaǵnı patsıent quqyǵy saqtalýy úshin turaqty jumys júrgizedi.
Qormen TMKKK sheńberinde jáne MÁMS júıesinde medıtsınalyq qyzmetter kórsetýge shart jasaı otyryp, medıtsınalyq uıym halyqqa sapaly medıtsınalyq kómek kórsetý jáne onyń qoljetimdiligin qamtamasyz etý úshin jaýapkershilikti ózine alady. Jetkizýshige qoıylatyn bul talaptar shartta jeke tarmaqpen belgilengen jáne olardyń oryndalýy Qor tarapynan baqylanady» - dep atap ótti Medıtsınalyq saqtandyrý qorynyń elorda fılıalynyń dırektory N.Qabdyqaparov.
Eger emhana deńgeıindegi jaǵdaıdy sheshý múmkin bolmasa, emdelýshilerde medıtsınalyq saqtandyrý qoryna keri baılanystyń resmı arnalary arqyly júginý múmkindigi bar:
Qoldau 24/7 mobıldi qosymshasy
@saqtandyrybot telegramboty
1406 baı̆lanys ortalyǵy
Qordyń fms.kz saı̆ty
Sarapshylar TMKKK sheńberinde jáne MÁMS júıesinde medıtsınalyq kómek alý boıynsha keńes beredi, mártebesi men tólemi boıynsha aqparatty tekseredi, qajet bolǵan jaǵdaıda máseleni sheshýge medıtsınalyq uıymnyń sarapshylaryn jumyldyrady.