Astanadaǵy medıtsınalyq týrızm: 65 myń naýqas óńirlerden kelip emdeldi
ASTANA. QazAqparat - Astana qalasy Qoǵamdyq densaýlyq saqtaý basqarmasy basshysynyń orynbasary Álııa Rústemova elordadaǵy medıtsınalyq uıymdar qyzmeti boıynsha esep berdi, dep habarlaıdy QazAqparat.
Onyń aıtýynsha, qazirgi ýaqytta Astana qalasynyń qoǵamdyq densaýlyq saqtaý basqarmasy qaramaǵynda 37 medıtsınalyq uıym jumys isteıdi.
«Qala qarqyndy damyp keledi, jyl saıyn elordada 30 myńǵa jýyq náreste dúnıege keledi. Jyl saıyn ishki medıtsınalyq týrızm sheńberinde ózge oblystardan keletin 65 myńnan astam naýqas sapaly em alady. Qazirgi ýaqytta Astanada emdeletin árbir 5-shi naýqas - ózge óńirlerdiń turǵyndary.
Densaýlyq saqtaýdy damytýǵa arnalǵan memlekettik baǵdarlamalar arqasynda ómir súrý uzaqtyǵynyń aıtarlyqtaı ósýine qol jetkizdik. Búginde elordada ómir súrý uzaqtyǵy 76,2 jasty qurady, bul respýblıka boıynsha eń joǵary kórsetkish», - dep atap ótti Á. Rústemova Astana ákimdiginde ótken baspasóz máslıhatynda.
20 jylda Astanadaǵy týý kórsetkishi 2,3 esege ósken jáne ólim deńgeıi 2,8 esege tómendegen. Sondaı-aq, bul ýaqytta qalada týberkýlezden kóz jumǵandar sany 18,6 esege, mıokard ınfarktinen qaıtys bolǵandar - 4 esege, ana ólimi - 11,8 esege jáne sábı ólimi - 3,5 ese tómendedi.
«2018 jyldyń birinshi jartysynda Basqarmaǵa qarasty aýrýhanalarda 25 myńnan astam patsıent emdelip, 4500-den astam ota jasaldy, onyń ishinde 1691 otada joǵary tehnologııaly medıtsınalyq qyzmet kórsetilgen. «SMART Medıtsına» jobasyn iske asyrýda da belsendi jumystar júrgizip jatyrmyz. Qujattamany tsıfrlaý boıynsha 800 myńnan astam medıtsınalyq qujattar elektrondyq formatqa kóshirildi», - dep atap ótti Á. Rústemova.
Basqarma ókiliniń aıtýynsha, qazirgi ýaqytta Astana turǵyndarynyń 93% elektrondy densaýlyq pasportyna ıe boldy. Bul pasporttar bolashaqta jańa derektermen tolyǵyp, naýqas týraly barlyq aqparatty saqtaıtyn bolady.
