Astanadaǵy medıtsınalyq call-ortalyq 217 myń adamǵa qyzmet kórsetken
Osy jyldyń basynan bastap biryńǵaı medıtsınalyq baılanys ortalyǵyna 217 myńnan astam adam habarlasqan.
Qala turǵyndary ózderiniń medıtsına salasy boıynsha týyndaǵan barlyq suraqtaryna tolyq aqparat alýǵa barynsha jaǵdaı jasalýda. Osy talapqa saı bolý úshin biryńǵaı medıtsınalyq baılanys ortalyǵy táýlik boıy qyzmet kórsetedi.
«Kóptegen habarlama, shaǵymdar birden medıtsınalyq uıymdardyń bas dárigerleriniń sapany baqylaý boıynsha orynbasarlaryna baǵyttalady. Bizdiń mindetimiz - tez arada sheshý», deıdi mekeme koordınatory Lázzat Rysbekova.
Onyń aıtýynsha, operatorlar bir mezette 60 qońyraýdy qabyldaı alady. Olar mynadaı qyzmetter: dárigerdiń qabyldaýyna jazylý jáne keńes alý, dárigerdi úıge shaqyrý, aqparat berý, túsken aqparatty baqylaýǵa qoıý. Sondaı-aq, kómekshiler konsýltatsııa beredi jáne dári-dármekpen qamtamasyz etý máseleleri, mindetti medıtsınalyq saqtandyrý qory boıynsha keńes beredi. Sonymen qatar, halyqty skrınıngtik tekserýler men profılaktıkalyq tekserýlerden ótýge shaqyrady.
«Bizge kóbinese dári-dármekpen qamtamasyz etý jáne qyzmet kórsetý boıynsha habarlasady. Biz kez kelgen suraqqa basqa mekemelerge jyljytpaı jaýap berýge tyrysamyz. Barlyq ótinish arnaıy belgilengen tártip boıynsha tirkeledi. Túrli adamdar bar ǵoı, keıbiri ashýly, biri streste habarlasady, barlyǵyna kómektesýge tyrysamyz. Qońyraý shalýshynyń suraǵyna jáne kóńil-kúıine baılanysty bir adamǵa qyzmet kórsetý ýaqyty 7 mınýttan asyp ketýi múmkin», deıdi medıtsınalyq baılanys ortalyǵynyń aǵa operatory Elena Vorobeva.
Qazir Call-centerde - 41 qyzmetker bar. Olardyń qatarynda 29 operator, 9 keńes berýshi dáriger, 1 sýpervaızer jáne basshy bar. 1430 nomerine bir táýliktte 2 myńǵa taqaý habarlama túsedi, sonda 1 operatorǵa 200 qońyraýdan shyǵady. Operatordy jumysqa qabyldaǵanda eń basty talabymyz tózimdilik.
«Qazirgi kezde bizde 19 operator jumys jasaýda, 4 dárigerlik oryn bar, biz ony qońyraýlardyń túsýine baılanysty úlkeıtemiz. Keı ýaqyttarda óte kóp qońyraý túsedi. Sol kezderde biz habarlasýshyǵa tez jáne sapaly qyzmet kórsetý úshin qyzmetkerlerdiń qataryn kóbeıtemiz», deıdi L. Rysbekova.
Biryńǵaı medıtsınalyq baılanys ortalyǵynda saǵat 8:00-den 20:00-ge deıin 7 operatorlyq beket jumys atqarady, al saǵat 8:30-den 16:30 deıingi qarbalas ýaqytta 13 beket jumys atqarsa, sondaı-aq bir beket táýlik boıy jumys jasaıdy.
Qazirgi kúni ótinishterdiń 99 % telefon arqyly túsedi. Ortalyq áleýmettik jeliler arqyly da qyzmet kórsetýdi oılastyrýda. Ortalyqtyń Facebook jáne Instagram áleýmettik jelilerinde paraqshalary bar.
