Astanadaǵy match kezinde ombylyq hokkeıshi jaraqattanyp qaldy
ASTANA. QazAqparat - QR Prezıdenti Kýbogyna hokkeı boıynsha halyqaralyq týrnır aıasyndaǵy Astanada «Nevtehımıkpen» match barysynda ombylyq «Avangard» quramasynyń oıynshysy aýyr jaraqat alyp, aýrýhanaǵa jetkizildi dep habarlady «Barys» hokkeı klýbynyń saıtynan.
«Búgin «Avangard» - «Neftehımık» matchtarynyń bir kezeńinde birinshi komanda oıynshysy Krıstıan Kýdroch jaraqat aldy. Oryndyqqa deıin ózi jetken ol, biraz ýaqyttan keıin esinen tanyp qaldy. «Qazaqstan» sport saraıynda turaqty kezekshiliktegi dárigerler oǵan alǵashqy kómek kórsetti, alaıda ol esin jımaǵandyqtan, aýrýhanaǵa jetkizýge týra keldi. Oıynshyny jedel járdemmen alyp ketti», - delingen habarlamada.
Bapkerlik shtabtyń ekijaqty kelisimi boıynsha hokkeıshiniń jaraqaty aýyr bolǵandyqtan, oıyndy merziminen buryn aıaqtaý týraly sheshim qabyldandy. Aǵymdaǵy esep 1:1. Keıinirek «Barys» HK baspasóz qyzmetinen QazAqparat tilshisine Krıstıan Kýdroch esin jıǵanyn habarlady. «Avangard» klýby ókilderiniń aıtýynsha, Krıstıan Kýdroch jedel járdem kóliginde esin jıǵan. Jaraqattyń aýyrlyq dárejesi anyqtalýda. Sondyqtan oıynshy qazir astanalyq aýrhanalardyń birinde jatyr. Keıinnen oqıǵanyń jaı-japsaryn tolyǵyraq baıandaıtyn bolamyz», - dep atap ótilgen baspasóz qyzmetinen. Eske sala keteıik, Astanada «Qazaqstan Respýblıkasy Prezıdentiniń Kýbogy» V halyqaralyq týrnıri ótýde. «Barys» komandasynyń oıynshylary jarys aıasynda «Avangardpen» (Omby), «Neftehımıkpen» (Nıjnekamsk) jáne «Metallýrgpen» (Novokýznetsk) oıynǵa shyǵady.
