Astanadaǵy match kezinde «Avangard» oıynshysynyń mıy zaqymdanǵan
ASTANA. QazAqparat - Qazaqstan Prezıentiniń Kýbogy týrnıriniń aıasynda «Neftehımıkke» qarsy match kezinde esinen tanyp qalǵan «Avangard» komandasynyń oıynshysy Krıstıan Kýdroch óz-ózine keldi. Bul týraly ombylyq komandanyń Facebook-taǵy resmı paraǵynda jazyldy.
«Resmı málimdeme: Krıs Kýdroch esin jıyp, zaıybymen telefon arqyly sóılesti, ómirine esh qaýip tónip turǵan joq», - delingen taratylǵan habarlamada.
Budan basqa, týrnırdiń bas dárigeri Oleg Ishmakov ta bolǵan jaıtqa qatysty túsinik berdi. «Týrnırdiń ár oıynynda jedel járdem brıgadasy kezekshilik etedi. «Avangard» oıynshysy esin joǵaltqan sátte dárigerler birden kómekke keldi. Birlesken kúshpen alǵashqy qajetti rásimder jasaldy. Artynsha hokkeıshi Astanadaǵy birinshi qalalyq aýrýhanaǵa jetkizildi. Qazir aýrýhanada em alýda. Krıstıan óz-ózine keldi. Onyń qazirgi jaǵdaıy aýyr dep baǵalanýda, alaıda ómirine esh qaýip joq», - degen jarystyń bas dárigeriniń sózin keltiredi «Barys» HK baspasóz qyzmetinde. Dárigerler oıynshyǵa mıy zaqymdanǵan degen dıagnoz qoıdy. «Qazir oǵan ushaqpen ushýǵa bolmaıdy, sondyqtan da «Avangard» hokkeıshisi Astanada 10 kúnge qalady», - dedi dáriger. Esterińizge sala keteıik, QR Prezıdenti Kýbogy úshin hokkeıden halyqaralyq týrnır aıasynda Astanada «Nevtehımıkpen» match barysynda ombylyq «Avangard» quramasynyń oıynshysy aýyr jaraqat alyp, aýrýhanaǵa jetkizilgen edi.
