Astanadaǵy «Máńgilik el» arkasynyń ústinde sholý alańy ashyldy
ASTANA. QazAqparat - Astanada «Máńgilik el» saltanatty arkasynyń ústinde qala kórkin tamashalaıtyn sholý alańy men kórme galereıasy ashyldy, dep habarlaıdy «QazAqparat» HAA tilshisi.
El Táýelsizdiginiń 20 jyldyǵyna arnap turǵyzylǵan Saltanatty arkanyń bıiktigi de 20 metrdi quraıdy. Sholý alańyna deıin kelýshilerdi kásipqoı gıdter Aqmola óńiriniń qalyptasýy men tarıhy kórsetilgen fotosýretteri bar baspaldaqpen alyp júredi jáne qazaq, orys, aǵylshyn tilderinde qala tarıhymen tanystyrady. Erekshe kútimdi qajet etetin kelýshiler úshin arnaıy lıft ornatylǵan.
Qaqpanyń jetinshi qabatynda aýmaǵy 120 sharshy metr bolatyn jańa kórme zaly ornalasqan. Onda sheteldik jáne otandyq sýretshilerdiń, músinshilerdiń, sándik-qoldanbaly óner sheberleriniń týyndylary qoıylyp, túrli fotokórmeler ótkiziledi dep josparlanǵan. Kórme zaly arqyly qaqpa tóbesinde ornalasqan sholý alańyna shyǵýǵa bolady. Kelýshiler sholý alańynyń tórt buryshyna qoıylǵan tórt dúrbimen tutas qalany tamashalaı alady.
«Qaqpa dúısenbiden ózge barlyq kúni, tańǵy 10-nan keshki17:00-ge deıin jumys isteıdi. Árıne, EKSPO qarsańynda qala qonaqtarynyń kóbeıýine baılanysty, jumys ýaqytyn uzartý kózdelip otyr. Kirý quny eresekterge - 500 teńge, balalarǵa - 350 teńge. Bul orynnan kelýshilerdiń qazaq halqynyń óneri men mádenıeti týraly óte qundy derekter men umytylmas áser alyp keteri anyq. Jańa sholý alańy týrısterdiń qyzyǵýshylyǵyn oıatyp qana qoımaı, túlekter men jas jubaılar arasynda tanymal orynǵa aınalaryna úmittenemiz», - dep atap ótti Astana qalasy Mádenıet, muraǵattar jáne qujattama basqarmasy basshysynyń orynbasary Narıma Muhambetalına.
Atap ótken jón, saltanatty arkalarda sholý alańdary men kórme zaldaryn ashý álemdik tájirıbede bar. Oǵan dálel - Parıj, Barselona, Mýmbaı, Býharest qalalaryndaǵy qaqpalar. Ásirese, Parıjdiń Sharl de Goll alańynda ornalasqan trıýmfaldy arkaǵa jyl saıyn mıllıondaǵan týrıster keledi.
«Máńgilik el» saltanatty arkasy - Qazaqstan Respýblıkasynyń Prezıdenti Nursultan Nazarbaevtyń bastamasymen 2011 jyly turǵyzylǵan. Avtorlary - sáýletshi Saǵyndyq Jambolatov jáne músinshiler Murat Mansurov pen Nurlan Dalbaı.
