Astanadaǵy «Máńgilik el» arkasy aýmaǵynda landshaft paıda bolady
NUR-SULTAN. QazAqparat – Elordadaǵy «Máńgilik el» saltanatty arkasy mańynda aǵashtar otyrǵyzylyp, jasyl alań jasalyp jatyr. Bul týraly Nur-Sultan qalasy ýrbanıstıka ortalyǵynyń basshysy Elnar Bazyken málim etti, dep habarlaıdy QazAqparat tilshisi.
Jospar boıynsha «Máńgilik el» arkasy aýmaǵynda 12 myń kóshet otyrǵyzylady. Olardyń qatarynda qylqan japyraqty jáne kópjyldyq aǵashtar bar.
«Máńgilik el» arkasy elorda halqy men qala qonaqtary baratyn basty oryndardyń biri. Búginde atalǵan nysan aýmaǵyn kógaldandyrý jumysy júrip jatyr. Qalalyq senbilik barysynda 300-den astam kóshet otyrǵyzyldy. Maqsat – kógaldandyryp, jasyl alań jasaý. ıAǵnı ol jerge halyq tamashalaý úshin kelip qoımaı, demalý, serýendeý múmkindigi de týady», - dedi qalalyq ýrbanıstıka ortalyǵynyń basshysy Elnar Bazyken.
Onyń aıtýynsha, kógaldandyrý jumysy «Nur-Sultan jaıly qala» jospary aıasynda júzege asyp jatyr.
Esil aýdany ákimdiginiń baspasóz qyzmetiniń bizge bergen aqparatqa sáıkes, atalǵan jumys sáýirde bastalyp, mamyrdyń sońyna deıin jalǵasady.
Eske sala ketsek, taıaýda Nur-Sultan qalasy qurylys basqarmasynyń basshysy Ársen Jańǵasqanov «Máńgilik el» arkasynyń qaıta jóndeýden ótetini týraly aıtty .
«Bıyl mádenıet nysandaryn damytýǵa 388 mln teńge bólindi. Qazir bizge «Bozoq» ulttyq parki qurylysy jobasyn aıaqtaýǵa 46 mln teńge kerek. Sonymen qatar «Máńgilik el» arkasy qaıta jóndeýdi qajet etedi. Búginde atalǵan nysannyń qujaty qaralyp jatyr. Jumys aýqymdy, ǵımarat tóbesinen sý aǵady. Bul arka qaladaǵy betke ustar kórikti oryndardyń biri. Sondyqtan nazarǵa alýlaryńyzdy suraımyn», - dedi ol qalalyq máslıhatynyń otyrysynda jasaǵan baıandamasynda.
