Astanadaǵy M. Gorkıı atyndaǵy Orys drama teatry óziniń 110-shy mereıtoılyq maýsymyn ashty
ASTANA. Qazannyń 15-i. QazAqparat /Jasulan Amanbaıuly/ - Astanadaǵy Maksım Gorkıı atyndaǵy Orys drama teatry óziniń 110 jyldyq mereıtoıyn atap ótýde.
Orys drama teatry 1899 jyly «dramalyq ónerge áýes jurttyń ótinishi» boıynsha tuńǵysh ret Aqmola jerinde negiz qalady. Áýelde qalalyq basshylyqtyń jáne Kýbrın degen kópestiń qarjysyna salynǵan teatr úıi, keıin Muhtar Áýezovtiń ózi kelip spektakl qoıylymdaryn qoıatyn óner oshaǵyna aınaldy.
Ár jyldary bunda «Halyq qaharmany» ordeniniń kavaleri Ázirbaıjan Mámbetov, Qazaq KSR-niń Halyq ártisi E. Orel, Qazaq KSR-niń Eńbek sińirgen ártisteri E. Marýsına, S. Grýpp, N. Mılovıdov, A. Hodaev, I. Goroshevıch, N. Nazarkovskaıa, A. Chervov, Moldavııanyń Eńbek sińirgen ártisi R. Svetınskaıa, KSRO Memlekettik syılyǵynyń laýreaty M. Kovaleva, QR Halyq ártisi V. Arhıpenkov QR Mádenıet qaıratkeri, «Qurmet» ordeniniń kavaleri S. Prılýtskaıa syndy iri teatr maıtalmandary óner kórsetti.
Qazir teatr repertýarynda N. Gogol, A. Chehov, J. Kokto, A. Vampılov, N. Ptýshkına, Ý. Shekspır, S. Mrojek, R. Otarbaev jáne taǵy da basqa jazýshylardyń pesalarynyń negizinde jazylǵan 20-ǵa tarta spektakl bar.
Búgin onyń 110 jyldyq mereıtoıyna Qazaqstannyń barlyq óńirlerinen teatr ujymdary kelip quttyqtaý aıtty.
«Men bul ujymda eshqashan qyzmet istemesem de, bul teatrdy burynnan bilemin. Teatr oblystyq deńgeıli teatr aýqymynan áldeqaıda asyp ketken. Qazir bul ujymnyń tanymaldylyǵy Qazaqstan aýmaǵynan tys jerge shyǵyp, Reseıge tarala bastaǵan. Men osynda óner kórsetetin meniń áriptesterime qalaı qıyn ekendigin túsinemin. Sebebi qalanyń qarqyndy ári tamasha damý rıtmine ilesý asa aýyr. Sondyqtan sáttilik tileımin!»,-deıdi M.ıÝ.Lermontov atyndaǵy Memlekettik akademııalyq orys drama teatrynyń kórkemdik jetekshisi Rýben Andreasıan.
