Astanadaǵy Lomonosov atyndaǵy Máskeý memlekettik ýnıversıtetiniń qazaqstandyq fılıalynda túlekter jármeńkesi ótip jatyr
STANA. Shildeniń 8-i. QazAqparat /Gúlmıra Álıakparova/ - M.V.Lomonosov atyndaǵy Máskeý memlekettik ýnıversıtetiniń qazaqstandyq fılıalynyń túlekteri - Qazaqstannyń strategııalyq damý baǵyttaryna baǵdarlanǵan. Bul týraly búgin atalmysh oqý ornynda ótip jatqan túlekter jármeńkesinde fılıal dırektory Aleksandr Sıdorovıch aıtty.
«Bizdiń túlekter M.V.Lomonosov atyndaǵy Máskeý memlekettik ýnıversıtetiniń dıplomdaryn alyp shyǵady. Biraq bizdiń alǵyshartymyz olardy Qazaqstannyń strategııalyq damý baǵyttaryna baǵdarlaý bolyp tabylady. Biz mamandardy Qazaqstan úshin daıarlaımyz. Sondyqtan olar memlekettik jáne orys tilderin jetik meńgergen, oqý jyldarynyń jartysyn Máskeýde ótkizetindikten, olar eki eldiń de ishki, syrtqy saıasattarymen etene tanys», - deıdi ol.
Bıyl MMÝ-dyń qazaqstandyq fılıalyn matematıka, qoldanbaly matematıka jáne ınformatıka, ekonomıka (bakalavrıat jáne magıstratýra), fılologııa, ekologııa jáne tabıǵatty paıdalaný mamandyqtary boıynsha 121 stýdent aıaqtap otyr, onyń 24-i - úzdik dıplommen.
Túlekter jármeńkesine qatysyp otyrǵan jumys berýshilerdiń aýqymy da óte keń. Olardyń arasynda QR Ekonomıkalyq damý jáne saýda, Aýyl sharýashylyǵy men Qorshaǵan ortany qorǵaý mınıstrlikteri, QR Statıstıka agenttigi, «Nazarbaev ıntellektýaldyq mektebi», «Qazaqstan Ǵarysh sapary» ulttyq kompanııasy, «QazMunaıGaz Ónimderi» AQ jáne birqatar iri jekemenshik bank qurylymdary bar.
Aıta keteıik, M.V.Lomonosov atyndaǵy Máskeý memlekettik ýnıversıtetiniń qazaqstandyq fılıaly Qazaqstan Prezıdenti Nursultan Nazarbaevtyń bastamasymen 2000 jyly quryldy. Osy ýaqytqa deıin oqý ornynan 400-den astam jas túlek qanat qaqty. JOO-ǵa túsken stýdentterdiń barlyǵy memlekettik grant boıynsha bilim alady. Olardyń jyl saıynǵy sany - 125 stýdent, 20 magıstrant.
