Astanadaǵy qylmys deńgeıi respýblıkalyq kórsetkishten 1,7 esege joǵary bola tura, onyń ashylýy eń tómen deńgeıde - Memleket basshysy
ASTANA. 11 sáýir. QazAqparat - Astanadaǵy qylmys deńgeıi respýblıkalyq kórsetkishten 1,7 esege joǵary bola tura, onyń ashylýy eń tómen deńgeıde.
Búgin elordadaǵy Táýelsizdik saraıynda Astanany odan ári damytý boıynsha ótip jatqan keńes barysynda Elbasy Nursultan Nazarbaev Bas qaladaǵy qylmyspen kúres máselesin jandandyrýǵa qatysty tapsyrma júktedi.
«Sport nysandarynyń ornyna qalada býkmekerlik keńseler, oıyn zaldary qyzý qaınap jatyr. Olardyń sany 500-den asypty. Sóıtip, jastar sportpen shuǵyldanýdyń ornyna álgi mekemelerde ýaqytyn zaıa ketirip júr. Tipti bulardyń ózi jas azamattardy qylmysqa tartýdyń alǵysharty sekildi», - dedi Elbasy.
Memleket basshysynyń aıtýynsha, elordadaǵy qylmys deńgeıi respýblıkalyq deńgeıden 1,7 esege artyq. Al qylmystyń ashylýy eń tómen deńgeıde.
«Men ótken keńeste Astananyń eń tynysh qala bolýy tıistigin aıtqanmyn. Qylmysty ashý boıynsha jumysty jaqsartý qajet. Sondyqtan da, Іshki ister mınıstrine qalalyq departament basshysymen birlesip, osy baǵyttaǵy jumysty jandandyrýdy tapsyramyn. Men búgingi keńeske ázirlik barysynda úlken qalalarda bul salada ne isteıtinin ádeıi qarap shyqtym. Bir kezderi Nıý-Iork Amerıkanyń eń krımınaldy qalasy bolǵan eken. Jańa mer, jańa polıtsııa keldi. Sosyn olar qalaǵa tártipti eń aldymen, kishigirim qylmyspen kúresten bastady», - deı kele, Elbasy kishigirim qylmyspen kúrestiń osyndaı ozyq tájirıbelerin engizý qajettigin aıtty.
«Astana qazirshe shaǵyndaý, asa úlken emes. Sondyqtan, qylmyspen kúresti ázirden jandandyrý kerek. Oǵan qajettiniń barlyǵyna tikeleı mınıstr qoldaý jasaıdy», - dedi N. Nazarbaev.
