Astanadaǵy kúıshi-kompozıtorlar alleıasynda dombyra músini ornatyldy
Naýryz meıramy bata berý rásimimen bastaldy. Igi sharaǵa jınalǵan jurtshylyqqa qala turǵyny, eńbek ardageri Ótegen Násipuly aq batasyn berdi.
Búgin kúıshi-kompozıtorlar alleıasynda qazaqtyń ulttyq aspaby – dombyranyń músini ornatyldy. Qadirmendi meıman retinde dombyra músininiń ashylý saltanatyna qatysqan Halyq Qaharmany, ǵaryshker Toqtar Áýbákirov quttyqtaý sóz sóıledi. Ol ulttyq qundylyqtarymyzdy jáne qazaqtyń kıeli dombyrasyn qadirleý men nasıhattaý baǵytyndaǵy jumystarǵa bárimiz de atsalysýymyz qajet ekenin aıtty. Óskeleń urpaq halqymyzdyń tarıhy men rýhanı-mádenı baılyǵyn sanasyna sińire bilýi úshin osyndaı bastamalar jalǵasyn taba beretini jóninde pikir bildirdi.
Jınalǵan qaýym atynan T. Áýbákirovtiń ıyǵyna oqaly shapan jabyldy. Óz kezeginde Toqtar Ońǵarbaıuly kórsetilgen qurmetke rızashylyǵyn bildirip, «elimizdi kórkeıtý jolynda qyzmet etip júrgen jastar halyqtyń alǵysyna bólenetin bolsyn» degen nıetpen ózine berilgen shapandy Astana qalasy Almaty aýdanynyń ákimi Maqsat Samatulyna tartý etti.
«Astana qalasy ákimdiginiń qoldaýymen Dına eskertkishi mańynda mýzykalyq sýburqaq ornatý josparymyz bar. Bul jer demalys aımaǵyna aınalmaq. 24 saǵat boıy qazaq kompozıtorlarynyń kúıleri men ánderi oryndalatyn bolady. Ár azamat ózin Qazaq eliniń azamaty ekenin sezinýi úshin osyndaı ister qolǵa alynyp jatyr. Óner ujymdarynyń kúı tartýyna arnalǵan ashyq sahna alańyn salý kózdelip otyr. Igi bastamany qoldaǵan sizderge kóp raqmet», - dedi «Kúı anasy» respýblıkalyq qorynyń jetekshisi Tólegen Qýanyshev.
Qoǵam qaıratkeri, jýrnalıst Serik Erǵalı halqymyz úshin Naýryz meıramynyń mańyzy erekshe ekenin aıta kelip, tól ónerimiz ben ulttyq aspaptarymyzdy dáriptep, jas urpaqqa jetkizýge bárimiz de úles qosýymyz qajettigin atap ótti.
El azamattary kúıshi, kompozıtor Dına Nurpeıisovanyń eskertkishine gúl shoqtaryn qoıyp, rýhyna taǵzym etti.
Qazaqstannyń eńbek sińirgen qaıratkeri, professor, kúıshi-ustaz Orynbaı Dúısen qolyna dombyra alyp, Dınanyń «Toıbastar» kúıin tartyp, kórermenniń ystyq yqylasyna bólendi.
Ulttyq merekege oraı, mádenı is-sharany Astana qalasy Almaty aýdanynyń ákimdigi, «Ulttyq múdde keńesi» qoǵamdyq birlestigi jáne «Kúı anasy» respýblıkalyq qory uıymdastyrdy.
