Astanadaǵy QR Ulttyq kitaphanasynda aqyn Baýyrjan Qaraǵyzulynyń «Jumbaqtasqa jaýǵan kúz» atty ádebı keshi ótedi

Bul kesh barysynda aqynnyń «Jumbaqtasqa jaýǵan kúz» atty kitabynyń tusaýkeseri bolady.

Bul ádebı keshtiń  maqsaty - qazaq eliniń ulttyq-rýhanı qundylyqtaryn, ulttyq pálsapasyn, ulttyq poezııasyn jas urpaqqa keńinen nasıhattaý. Astana qalasyndaǵy jas aqyn-jazýshylardyń shyǵarmashylyq deńgeıin kóterýge, rýhanı-ádebı ortanyń qalyptasýyna, jas daryndardyń jańa kózqarastaryn damytýǵa jaǵdaı jasaý. Kitaphana men oqyrmandy, oqyrman men avtordyń arasyn jaqyndastyrý.

Kesh qonaqtary: aqyn, QR halyq jazýshysy, Memlekettik syılyqtyń laýreaty Farıza Ońǵarsynova; aqyn, Muqaǵalı Maqataev atyndaǵy syılyqtyń laýreaty Nesipbek Aıtuly; aqyn, Halyqaralyq «Alash» syılyǵynyń ıegeri, QR Jazýshylar Odaǵynyń hatshysy Maraltaı Raıymbekuly; aqyn, QR Memlekettik «Daryn» jastar syılyǵynyń laýreaty Dáýletkereı Kápuly;  QR Memlekettik «Daryn» jastar syılyǵynyń laýreaty  Almas Temirbaıtaǵy da basqa Astana qalasyndaǵy zııaly qaýym, aqyn-jazýshylar qatysady.

Baýyrjan Qaraǵyzuly 1982 jyly 17 qazanda dúnıege kelgen. Halyqaralyq, respýblıkalyq, oblystyq, qalalyq ádebı konkýrstardyń birneshe márte jeńimpazy. Halyqaralyq «Shabyt» shyǵarmashyl jastar festıvaliniń laýreaty jáne Gran-Prı júldesiniń ıegeri. (2006-2008 j.) «Álemge áıgili - Astana» atty jyr músháırasynyń Gran-Prı júldesiniń ıegeri. (2010 j.) Seıdolla Báıterekov atyndaǵy arnaıy syılyqtyń ıegeri (2010j.) Qazaqstan musylmandary dinı basqarmasy uıymdastyrǵan Dinı óleńder múshaırasynda laýreat atanyp, «Umra» qajylyqqa joldama alǵan. (2010 j.) Dúnıejúzilik qazaqtardyń ІV Quryltaıy aıasynda ótken jastardyń Halyqaralyq «Jyrym saǵan, Atajurt!» jyr músháırasynyń Gran-Prı júldesiniń ıegeri (2011 j.) «Qazaqstan patrıoty» medaliniń ıegeri (2011 j.)
«Jumbaqtasqa jaýǵan kúz», «Óń.Men.Tús.» atty jyr-kitaptarynyń avtory.