Astanadaǵy «qoıandarǵa» 2 mln teńgeniń aıyppuly salyndy
ASTANA. QazAqparat - 21-23 shilde aralyǵynda Astanadaǵy qoǵamdyq kólikte arnaıy reıd ótti. Oǵan kóliktik baqylaý departamenti men jergilikti polıtsııa qyzmeti qatysty. Negizgi maqsat - jolaqy tólemeı júrgen jolaýshylardy anyqtaý, dep habarlaıdy QazAqparat tilshisi.
Resmı málimetke sáıkes, úsh kúnniń ishinde 52 adamǵa aıyppul salynǵan. Jalpy, jyl basynan beri qoǵamdyq kólikte jolaqy tóleýden bas tartqan 359 adam anyqtaldy. Olarǵa salynǵan aıyppuldyń kólemi - 1 726 790 teńgeni qurady. Budan bólek, atalǵan tártip buzýshylyqtarǵa jol bergen 130 kondýktor 1 563 250 teńgeniń aıyppulyn tóleıtin boldy.
«Astana LRT» qoǵammen baılanys jónindegi departamentiniń dırektory Naýat Azanbaevanyń aıtýynsha, qazirgi kezde kondýktorsyz júrgen avtobýstar bar. Biraq arnaıy baqylaýshylar jolaýshynyń aqyny tólegenin, ıa tólemegenin tekserip júredi.
«Ázirshe adamdar az júretin baǵyttarda kondýktorlardy alyp tastady. Máselen, 1-shi, 80-shi sııaqty marshrýttar bar. Ondaı avtobýstarda kólik júrgizýshisi ózi-aq bárine úlgerip jatyr. Sosyn kez kelgen aıaldamadan jelilik baqylaý qyzmeti minip, jolaýshylardy tekserip otyrady. Osy jumysqa jergilikti polıtsııa qyzmetkerleri de qatysady. Negizi, jolaýshyǵa kartany ótkize salǵan tıimdi. Sebebi bir rettik aıyppuldyń kólemi 2 AEK, ıaǵnı 4 810 teńgeni quraıdy», - dedi N.Azanbaeva QazAqparat tilshisine bergen suhbatynda.
Aıta keteıik, Astanadaǵy qoǵamdyq kólikte saralanǵan tarıfter engizilgeli beri kartamen júretin jolaýshylar úshin jolaqy burynǵy kúıinshe qaldy. Al qolma-qol aqsha beretinder 180 teńge tóleıdi. Biraq avtobýsta elektrondy kartany satyp alýǵa bolady. Іshinde balans bolmasa da, baratyn jerge tegin jetip alýǵa múmkindik beriledi. Keıbir kondýktorlar ony aıtpaıdy, kartany satsa da, ústinen jol júrý aqysy - 180 teńgeni de alyp qoıady.
