Astanadaǵy kóshpendiler festıvaline 10 memleketten qatysýshylar keledi
«Alǵash ret «Kóshpendiler Álemi» halyqaralyq festıvali ótken jyly uıymdastyrylǵan bolatyn. Festıvaldiń tanymaldyǵy artyp keledi. Ótken jyly álemniń 8 elinen 90 qatysýshy kelse, bıyl 10 memleketten 180 qatysýshy keledi. Olardyń basym bóligi baýyrlas túrki elderinen keledi. Biraq, Mońǵolııa, Koreıa jáne Irannan myqty komandalardyń jasaqtalǵany bizdi qýantady. Sonymen birge, Gúlstan provıntsııasynan bizdiń otandastarymyz keledi», - dedi «Kazakh Tourism» AQ basqarma tóraǵasynyń orynbasary Tımýr Dúısenǵalıev QR Mádenıet jáne sport mınıstrliginde ótken brıfıngte.
Festıval qatysýshylary Túrkııa, Ázerbaıjan, Bolgarııa, Iran, Ońtústik Koreıa, Qyrǵyzstan, Mońǵolııa jáne Ózbekstan elderinen keledi. Onda kásipshiler óz qolónerin kórsetedi, sadaqshylar - jebe atýda jarysady, semserlesý, kúres, ulttyq oıyndar ótedi jáne ulttyq taǵam túrleri usynylady.
Tımýr Dúısenǵalıevtiń aıtýynsha, kóshpendiler festıvalin ótkizýge 130 mln teńge bólinedi.
«Naqty festıvalge 130 mln teńge bólinedi. Onyń úshten bir bóligi sheteldik qonaqtardy shaqyrýǵa jumsaldy. Negizgi bóligi oıyndardy ótkizýge jumsaldy. Bul - álemde bar tájirıbe. Ǵun-Túrki quryltaıy ótkizetin kóshpendiler oıynynda da qonaqtar bar jaǵdaımen qamtamasyz etiledi. Aıta keteıin, bolgar, majar, qyrǵyz batyrlary óz ónerlerimen tabys tabady. Al munda esh gonorar almaıdy. Munda óz qalaýlarymen keledi», - dep atap ótti T. Dúısenǵalıev.
Festıval tujyrymdamasy 2008 jyldan beri Majarstanda ótetin Túrki halyqtarynyń úlken quryltaıyna negizdelgen. Jıyn baǵdarlamasynda festıval qatysýshylarynyń elorda kóshelerindegi sherýin, kásibı sadaqshylardyń, kókparshylardyń, búrkitshilerdiń jarysyn ótkizý josparlanǵan.
Kóshpendilerdiń etnoqalashyǵy «Qazanat» ıppodromy aýmaǵyndaǵy «Etnoaýyl» ulttyq mádenı kesheninde ornalasqan.
