Astanadaǵy qos munaranyń teńselýi: QTJ bas keńsedegi jaǵdaıdy túsindirip berdi
ASTANA. QazAqparat - Áleýmettik jelide «Qazaqstan temir joly» ulttyq kompanııasynyń bas keńsesinde túsirilgen vıdeo tarap ketti, dep xabarlaıdy QazAqparat tilshisi.
Atalǵan vıdeonyń ǵımarattyń 28-shi qabatynda ornalasqan dálizde túsirilgenin baıqaýǵa bolady. Ol dáliz eki munarany qosyp tur. Sol jerde qatty jeldiń saldarynan nysannyń qalaısha teńselip turǵanyn anyq baıqaýǵa bolady. Jerdegi keramıkalyq plıtka da qozǵalyp jatyr.
Aıta ketken jón, «QTJ»-nyń bir munarasy 37 qabattan turady. Onyń bıiktigi - 156 metr. Al ekinshi munara 174 metrge deıin sozylady. Ol nysanda 40 qabat bar.
«Qazaqstan temir joly» ulttyq kompanııasynyń baspasóz qyzmeti atalǵan vıdeoǵa qatysty túsinik berdi. Kompanııa ǵımaraty 2009 jyly paıdalanýǵa berilgen bolatyn. Jobany arnaıy uıymdar ("Memsaraptama" RMK. "QazNIISSA" RMK jáne taǵy basqa) tekserip shyqqan. Konstrýktsııa boıynsha ondaı bıik ǵımarattar temirbeton karkastan turǵyzylady.
Árbir munaranyń bıiktigin eskere otyryp, eki nysannyń arasyndaǵy dálizder arnaıy sharnırlerge ornatylǵan. Ondaıda qatty jel bolǵanda nysannyń sál-pál qozǵalyp turýy eskeriledi. Jobaǵa sáıkes, qatty jel soqqanda ǵımarattyń ústińgi jaǵy qozǵalyp turady. Dáliz de normatıv boıynsha qarastyrylǵan núktede ornatylǵan, - delingen «QTJ»-nyń túsiniktemesinde.
Aıta keteıik, búgin qatty boranǵa baılanysty Astanada tabıǵı sıpattaǵy tótenshe jaǵdaı jarııalandy. Jeldiń qatty bolǵany sonsha, Agrotexnıkalyq ýnıversıtettiń shatyry kókke ushty.
