Astanadaǵy kórmege bas qalanyń tarıhynan syr shertetin teńdessiz qujattar qoıyldy
ASTANA. 29 maýsym. QazAqparat /Jasulan Amanbaıuly/ - Elordada QR Ulttyq akademııalyq kitaphanasynda «Astana: keshe, búgin, erteń» atty derekti kórme ashyldy.
Onda Sankt-Peterbor qalasyndaǵy Reseı memlekettik tarıh muraǵatynan jáne Ombydaǵy Tarıh muraǵatynan buryndary belgisiz bolyp kelgen, Qazaqstannyń bas qalasynyń tarıhynan syr shertetin teńdessiz qujattar men málimetter usynylyp otyr.
Sankt-Peterbor derekteri Aqmola oblysy men qalasynyń eltańbasy, dalalyq ólkeniń ákimshilik-terrıtorııalyq erejesi jáne basqa da qundy málimetterdi beredi. Ombynyń muraǵaty bolsa, Esil ózeninde keme qatynasyn damytý, Aqmola qalasynyń jospary, oblys kartasy, óńirde poshta qyzmetin qurý, orman aǵashtaryn qorǵaý isin damytý syndy qujattardy qamtıdy.
Kórme ekspozıtsııasynda Astananyń búgingi ǵumyryna tıesili jádigerleri de qaz-qatar tizilgen. Onyń basym bóligin resmı shet el delegatsııalary qalaǵa tartý etken syılyqtary men kádeleri quraıdy. Sondaı-aq kórmege qoıylǵan elordadaǵy bolashaq ǵımarattardyń maket sulbalary qala turǵyndaryn erekshe qyzyqtyrdy.
Ekspozıtsııa sonymen qatar, ólkeniń tarıhı jolyn baıandaıtyn kitaptarmen tolyqtyrylǵan. Kórmeniń kitap bóligi «Astana shejiresi», «Elbasy syzǵan sáýletin» jáne «Bolashaqqa qulash urǵan bas qala» bólimderine bólingen.
«Elorda kúnine arnalǵan kórme - QR Ulttyq akademııalyq kitaphanasy men Astana qalasynyń Muraǵat jáne qujatnama basqarmasynyń alǵashqy birlesken jobasy. Tarıhtyń eki iri saqtaýshysy búgin Astana týraly tarıhı kitaptar men qujattardy qala turǵyndarynyń nazaryna usynýda», - dep atap ótti kitaphana dırektory Janna Shaımuhambetova.
