Astanadaǵy kórmede sırek kezdesetin ıt tuqymy usynyldy (FOTO)
ASTANA. QazAqparat - Búgin Astanadaǵy «Kórme» ortalyǵynda ıtterdiń ulttyq sertıfıkattyq kórmesi ótip jatyr. Bul sharaǵa Qazaqstannan 58 tuqym boıynsha 170-ten astam ıt qatystyrylýda.
Kórme qorytyndysy boıynsha úzdik 10 tuqymdyq toptyń ókilderi iriktelinbek. Osydan keıin Qazaqstan chempıony kandıdatynyń tıtýly beriledi.
«Osylardyń arasynda eń kishkentaılary toıterrer men chıhýahýalar, al eń irileriniń sanatynda Orta Azııalyq ovcharkalar men tıbettik mastıfter. Sonymen qatar, kórmede sibirlik hakılerdi, Orta Azııalyq jáne Shyǵys Eýropalyq ovcharkalardy kóptep kezdestirýge bolady.
Buryndary óte tanymal bolǵan býldog jáne rotveıler tuqymdary óte az kelgen. Jalpy, osy sharaǵa negizinen Almaty, Qaraǵandy, Qostanaı, Kókshetaý, Petropavl, Rýdnyı, Temirtaý jáne Astana qalalarynan belsendi qatysýda»,-dedi kórme komıtetiniń tóraǵasy Evgenıı Mechkovskıı.
Belgili bolǵandaı, kórmege orystyń qara terıeri tuqymynan jalǵyz ǵana ıt kelgen eken.
Lavrentıı Pavlovıch esimdi osy ıt orys jáne nemis tilindegi buıryqtardy túsinetin kórinedi. Mamandardyń sózine qaraǵanda, ıttiń boıy 72 sm-ge, al salmaǵy 68 kelige jetedi, sondyqtan bul tuqymdas ıtterdi jeke úıde ustaǵan durys.
«Qazirgi kezde bul ıtter Qazaqstanda óte sırek kezdesedi. Ol balalar men áıelderge tıispeıdi, al erlerge saqtyqpen qaraıdy, ıaǵnı tisin batyrýy múmkin. Genetıka boıynsha ol kúzetke arnalǵan»,-dep oıymen bólisti qaraǵandylyq Alekseı Somarın.
