Astanadaǵy kórme múgedek qazaq balasy men frantsýz sýretshisi arasyndaǵy dostyqty pash etti
ASTANA. 1 qarasha. QazAqparat - Búgin Astanadaǵy Qazirgi zamanǵy óner murajaıynda qarapaıym qazaq balasy men frantsýz sýretshisi arasyndaǵy dostyqty beıneleıtin kórme ashyldy. Avtor Baqytjan Jumanov esimdi múgedek balanyń arman-tilegin komıks arqyly kórsetip, múmkindigi shekteýli adamdardyń taǵdyr tálkegine túsken ómirin sheber jetkize bildi.
Kórmeni aralap kórgen adam ıllıýstrator ári komıks avtory Nıkolıa Jýrnýdyń qarapaıym qazaq balasymen tanysyp, dos bolǵan sátterin anyq kóre alady. Bas kezinde Baqytjan tuıyq boldy. Biraq artynan Nıkolıamen jaqyn tanysyp, oǵan óz ómiri men arman-qııalyn aıtyp beredi. Ol múgedek bolǵanyna qaramastan, álemniń úzdik fýtbolshysy atanǵan Lıonel Messı sııaqty oınap, sportta úlken jetistikterge jetýdi armandaıdy. Alaıda, polıomıelıt aýrýyna dýshar bolǵan Baqytjan osy ómirde tek arbamen ǵana júrýge májbúr. Qol-aıaǵy da durys qımyldamaıdy. N.Jýrný bolsa, qazaq balasynyń júreginde jatqan oı-armandaryn komıks arqyly iske asyrdy, tipti, Baqytjandy «Super Normal» qaharmanyna aınaldyryp, komıks arqyly sheber jetkize bildi.
Baqytjan óz ómirinde fýtboldy jaqsy kórip, únemi «Barselona» komandasyna jankúıer bolyp otyrady. Al osy klýbtyń urany - «Mes qu'in club», ıaǵnı «Klýbtan da joǵary» degendi bildiredi. Al kórmeniń ataýy - «Bloktan da joǵary». Sebebi bas kezinde ıllıýstrator ári komıks avtory Nıkolıa Jýrný 18 jasar Baqytjannyń ómiri men taǵdyry týraly óz blogynda jazyp, sýret arqyly jetkizip kelgen.
«Meniń negizgi maqsatym - eki adamnyń, saý men múgedektiń, frantsýz ben qazaqtyń arasyndaǵy dostyqty kórsetý ǵana emes, múmkindigi shekteýli azamattardyń qıyn taǵdyryn jetkizý. Olardyń osy qoǵamdaǵy ornyn, biz sııaqty armandap, qııal álemine sapar jasaıtynyn kórsetýge tyrystym», - deıdi N.Jýrný.
