Astanadaǵy Qorqyt ata festıvaline 5 eldiń dástúrli mýzyka oryndaýshylary qatysýda
ASTANA. 19 maýsym. QazAqparat - Búgin Astanada Qazaq ulttyq ýnıversıtetinde «Astana - túrki áleminiń mádenı astanasy» jyly aıasynda Qorqyt ata atyndaǵy óner festıvali ashyldy.
Oǵan 60-tan astam dástúrli mýzykanyń otandyq jáne shetel oryndaýshylary qatysýda. Qatysýshylardyń jasyna qoıylatyn talap boıynsha festıvalde tek 30 jasqa deıingi jas ónerpazdar baqtaryn synaıtyn bolady. Shara uıymdastyrýshylary qobyz, úrmeli jáne ishekti aspaptarda úzdik oryndaýshylardy anyqtamaq. Astanaǵa baıqaýǵa qatysý úshin Ázirbaıjan, Ózbekstan, Qazaqstan, Qyrǵyzstan jáne Qaraqalpaqstan elderinen jas oryndaýshylar kelip otyr.
«Qobyz» atalymynda qazylar alqasynyń tóraǵasy Álqýat Qazaqbaevtyń aıtýynsha, Qorqyt ata festıvali Astanada tuńǵysh ret ótkizilýde. Jobanyń bir ereksheligi munda tek qazaq ulttyq kúıleri oryndalady. Basty talap - Qorqyt ata kúıleriniń birin fortepıanonyń súıemeldeýi boıynsha oryndap shyǵý.
«Dástúrli mýzykanyń oryndaýshylary bul oqıǵany kópten beri kútti. Buryndary Qorqyt ata festıvali basqa qalalarda, negizinen ózge óńirlerde ótkizilip kelgen. Kelesi jyly atalmysh festıvaldi Týrkııada uıymdastyrýdy josparlap otyrmyz», - deıdi QR Prezıdenti syılyǵynyń ıegeri Á. Qazaqbaev.
Onyń atap ótkenindeı, festıvaldiń júlde qory 11 mln. teńgeni qurady. Laýreattardy marapattaý jáne festıvaldiń qorytyndy gala-kontserti Qazaq ulttyq óner ýnıversıteti ornalasqan «Shabyt» ǵımaratynda 21 maýsym kúni ótpek.
Sharany QR Mádenıet jáne aqparat mınıstrligi jáne Túrkııa elshiliginiń «ıÝnýs Emre» ortalyǵy uıymdastyrýda.
