Astanadaǵy kóppáterli úıdiń turǵyndary qum aralas sý iship otyr
«Ótken jyly kúz aıynda sýyq sýdy qosqanda qum shyǵa bastady. Onyń ózin birden baıqaǵan joqpyz. Oǵan deıin tamaq ázirleýge paıdalandyq. Bir kúni ydys-aıaq jýyp jatqanda aq keseniń túbindegi qumdy baıqadym. Birden dabyl qaǵyp, qyzmet kórsetýshi kompanııaǵa habar berdik. Alaıda bir kún ótti, eki kún ótti, bir apta, tórt aı boldy, qum tolastaıtyn emes. Kir jýǵysh mashınkalarymyz bitelip jatyr. Aýyz shaıýǵa, tis jýýǵa qorqamyz. Ýnıtazdyń sý jınaǵyshy qumǵa tolyp ketti. Sumdyq qoı! Astananyń qaq ortasynda otyryp, qum aralas sýdy iship otyrmyz», - deıdi Gúlmıra esimdi turǵyn.
Atalǵan úıge «Alıans Servıs» JShS qyzmet kórsetedi. Kompanııa basshysy Beımbet Ýálıevtiń aıtýynsha, qum aralas sýdyń shyǵýyna «Astana Sý arnasy» MKK jaýapty. Sebebi ortaq qubyrdyń bir jeri tesilgen. Endi, qum aralas topyraq magıstralǵa túsip, «Saýran-20» kóppáterli úıge ketip jatyr. «Men olarǵa talaı ret aıttym, ortaq qubyrdyń tesilgen jerin tabý qajet. Biz byltyrdan beri hat jazyp jatyrmyz. Bylaı da qońyraý shalamyz. Sońǵy kezde olar úndemeı qutylatyn boldy. Men anyq aıta alamyn, ortaq qubyr bir jerinde tesilgen. Jerdiń astynda bolǵannan keıin kórinbeıdi. Sý sorǵylaryn óshirgende qubyr qum aralas topyraqty ishine tartyp alady. Al sý sorǵylary qaıta qosylǵanda «Saýran-20»-ǵa qaraı aıdaıdy. Osyny aıtsam, tyńdamaıdy. Qubyrdyń jarylǵan jerin izdegisi kelmeıdi-aý deımin. Sýdyń jer betine shyqqanyn kútip júrgen shyǵar. Osy Saýran men Syǵanaqta ylǵı qubyr jarylady», - dedi B.Ýálıev QazAqparat tilshisine bergen suhbatynda.
Onyń aıtýynsha, bas kezinde qumǵa qarsy fıltrdi qoıyp kórdi. Alaıda atalǵan qurylǵylar birden bitelip qalady. Sebebi ortaq magıstraldan keletin qum tolastamaı jatyr. «Fıltr on mınýttyń ishinde bitelip qalady. Ony olaı da, bylaı da qoıdyq. Túk shyqpady, fıltr biteledi de sý joǵary qabattarǵa kóterilmeıdi. Sosyn fıltrdi múldem alyp tastadyq», - dep atap kórsetti B.Ýálıev.
