Astanadaǵy kópirler jańartylyp, jańa kelbet berildi
ASTANA. 5 qyrkúıek. QazAqparat - Elorda kópirleri qalamyzdyń jańa kelbetiniń nyshany bolyp tabylady. Olar kólik aǵynyn azaıtyp, Esil ózeniniń oń jáne sol jaǵalaýlaryn baılanystyryp tur.
Birneshe jyldan beri «Saryarqa» men M-2 kópirlerine kóp salmaq túsýde, bul tirek konstrýktsııalarynyń jáne jol jabyndarynyń tozýyna ákeldi.
Jolaýshylar kóligi jáne avtomobıl joldary basqarmasynyń astana.kz saıtyna habarlaýynsha, kópirlerdi jóndeý qalalyq sáýletti erekshelendirip qana qoımaı, kópir ótkelderiniń senimdiligi men qaýipsizdigin de arttyra túsedi.
Uzyndyǵy 220 m «Saryarqa» kópirinde 440 metrlik jol boıyndaǵy dińgekter aýystyrylyp, granıtpen qaptaldy. 544 metrlik bolat qorshaý qanattary jáne 20 syrtqy jaryqtandyrý tirekteri shoıynǵa aýystyrylady. 6 myń shaqyrymǵa jýyq asfaltbeton jabyny jańartyldy. Vedomstvonyń atap ótýinshe, kópirde dekoratıvti elementtermen kórý alańdaryn jasaý kózdelgen.
Óz kezeginde, uzyndyǵy 700 metrlik M-2 kópirin jóndeý jumystary kezinde 2160 metrlik joldyń boıyndaǵy dińgekter aýystyrylyp, granıtpen qaptaldy. Sondaı-aq, 1500 metrlik bolat qorshaý qanattary jáne 30 syrtqy jaryqtandyrý tirekteri shoıynǵa aýystyrylady. Kópir qurylystarynyń negizgi qasbetteri de ózgeredi.
«Kópirlerdiń sáýlet-músindik kompozıtsııasy qazaq halqynyń jáne kóshpendiler órkenıetiniń baı tarıhı-mádenı murasyn jetkizedi. Stılıstıkalyq beıneler skıfterdiń dekoratıvtik óneriniń kórkem buıymdaryna uqsaıdy», - delingen aqparatta.
«Saryarqa» kópirine shyǵa beriste jaǵadaǵy tireýlerge satymen sáýlet-músindik kompozıtsııalar jasalýda. Ár kompozıtsııanyń ortalyq elementi shar tárizdes tor stela bolyp tabylady, onyń beti qazaq dalasyndaǵy floranyń sýretterimen bezendiriledi. Shar torlary men jaryqtandyrý tirekteriniń jarmalaryndaǵy oıý-órnekter altyn túske boıalady. Bul skıfterdiń zergerlik óneriniń biregeı áralýandylyǵyn kórsetedi jáne elordamyzdyń Saryarqada «Altyn dalada» ornalasqanynyń belgisi bolyp tabylady. Bul tús kópirdiń «Saryarqa» ataýyn da ereksheleı túsedi», - dep habarlady astana.kz saıty.
M-2 kópirinde 4 stela qoıylady, olar sáýlet-qala qurylysy qyzmetin atqarady, sondaı-aq, tereń tarıhı-mádenı mánge ıe.
«Kópirdiń eki jaǵynan tirekterge stelalar qoıylady. Kópirge jaqyndaǵan kezde bul kompozıtsııa Astananyń ortalyq bóligine jalpy saltanatty kire beris retinde bolady», - delingen vedomstvo aqparatynda.
Stelanyń barlyq quramdas elementteri skıf dáýirindegi qoldanbaly óner týyndylaryna uqsatyp jasalǵan. Onyń beti músindik tormen órnektelip, altyn túske boıalady. Bul da skıfterdiń zergerlik buıymdarymen assotsıatsııalanady. Jaqtaý qorshaýlary kıiktiń basy beınelengen shamdarmen bezendiriledi.
