Astanadaǵy konkı tebý stadıonynyń qurylysy qosymsha qarjylaı shyǵyndardy talap etedi - I. Tasmaǵambetov
STANA. Naýryzdyń 17-si. QazAqparat /Jasulan Amanbaıuly/ - Astanadaǵy konkı tebý stadıonynyń qurylysy qosymsha qarjylaı shyǵyndardy talap etedi.
Bul týraly búgin QR Premer-Mınıstri Kárim Másimov Astanadaǵy qurylys nysandarynda ótkizgen kóshpeli keńes barysynda elorda ákimi Imanǵalı Tasmaǵambetov málim etti, dep habarlaıdy QazAqparat.
Qazirgi ýaqytta nysannyń jobalaý-smetalyq qujatnamasy jiti saraptaýdan ótýde.
«Bul saraptama qurylys jobalaýshylardyń surap otyrǵan qarjy somasynyń qanshalyqty shyndyqqa janasatyndyǵyn rastaýy tıis. Degenmen qurylysqa qajetti soma óse túsetindigi anyq bolyp otyr. Joba qunynyń ósýi obektıvti, bul bireýdiń qosymsha jumystardy qosyp qoıǵandyǵyna baılanysty emes», dep atap kórsetti qala basshysy K. Másimovke qaratyp aıtqan sózinde.
I. Tasmaǵambetovtyń aıtýynsha, qurylysqa qajetti soma 9 mlrd. teńge shamasynda dep josparlanýda. Onyń ishinde 3 mlrd. teńgesi konkı stadıonyn qural-jabdyqtarmen jabdyqtaýǵa, 6 mlrd. teńgesi jalpy qurylys jumystaryna qajet.
«Qurylys salýshylar 14 mlrd. teńge suratqan bolatyn. Biraq qurylystyń aıaqtalýyna 9 mlrd. teńge jetedi dep otyrmyz. Bárin saraptama sheshetin bolady», deıdi I. Tasmaǵambetov.
Konkı tebý stadıony 2011 jyly ótetin 7-shi Qysqy Azııa oıyndarynyń ınfraqurylymyna enedi. Nysan bıyl qyrkúıek aıynyń 10-shy juldyzynda aıaqtalmaq. Stadıonnyń tezirek iske qosylýy Azıadanyń bastalýyna sporttyq ınfraqurylymdardyń daıyndyǵyn tekserýge, synaq jarystaryn ótkizýge múmkindik beredi, dep habarlaıdy ákimdiktiń baspasóz qyzmeti.
