Astanadaǵy kólik aǵynynyń tyǵyzdyǵy birneshe jylda Almatyny qýyp jetedi
ASTANA. QazAqparat - Astana Qazaqstannyń óńirleriniń arasynda jańa kólikter satý naryǵyndaǵy absolıýtti ósim boıynsha kósh bastady, dep jazady qalalyq ákimdiktiń resmı saıty ranking.kz reıtıngtik agenttigine siltememen.
2013 jylǵy maýsymnan 2014 jylǵy maýsymǵa deıingi aralyqta úsh jylǵa deıingi jeńil mashınalar avtoparki 1,8 myńǵa (15,2%) artyp, 13,8 myńdy qurady. Jańa kólikterdiń úles salmaǵy - 5,8%.
Agenttik sarapshylarynyń atap ótýinshe, 10 jyldan asqan kólikter avtoparktiń 65,6%-yn quraıdy. Salystyryp qarasaq, Qazaqstan boıynsha eski kólikter jeńil mashınalar parkiniń 79,2%-yn alyp otyr. Elordalyq avtoparktiń ulǵaıýy baıqalady: ósim qarqyny 1,4% jáne Qazaqstan boıynsha ekinshi orynda.
Astana qalasy kólik naryǵy úshin eń perspektıvti aımaqtardyń biri bolyp tabylady. Ótken jyly (2013-2014jj. maýsym) qala halqynyń sany 835 myńǵa deıin artqan, ósim - 5%.
Elordanyń ekonomıkalyq ósiminiń joǵary qarqyny, tóleýge qabiletti halyq sanynyń artýy ony bankter úshin basymdy sektorǵa aınaldyrdy. Megapolıs qarjy naryǵynyń damýy jaǵynan kóshbasshylar tobyna jatady. Bank qyzmetterin engizý deńgeıi boıynsha Astana qarjy ortalyǵy - Almatyǵa ǵana ese jiberip otyr. Belsendi tólem kartalary halyqtyń 53% qamtıdy, al Qazaqstan boıynsha bul kórsetkish 37% ǵana.
Joǵaryda keltirilgen faktilerdi eskere kele, birneshe jyldan keıin elordanyń kólik aǵynynyń tyǵyzdyǵyn Almatynyń kórsetkishterimen salystyrý múmkin bolady.
