Astanadaǵy qoǵamdyq kólikter táýligine 515 myń jolaýshy tasymaldaıdy
Astana ákimdiginiń málimetinshe, bul jaıynda elordanyń Jolaýshylar kóligi jáne avtomobıl joldary basqarmasy Jolaýshylar tasymaly bóliminiń bastyǵy A. Tamabaev habarlady.
Astanadaǵy qoǵamdyq kólikter táýligine 515 myń jolaýshy tasymaldaıdy eken. Qyzmet kórsetý barysynda oryn alǵan azdy-kópti kemshilikter halyqtyń nazarynan tys qalmaıtyny anyq. Onyń ústine barlyq avtobýstar men túrli baǵytta júretin taksılerde tasymaldaý erejeleri buzylǵan jaǵdaıda habarlasa alatyn telefon nomerleri ilingen. Sondyqtan túrli mazmundaǵy shaǵymdardyń túsip jatýy zańdy. Halyqtyń bul talaptary boıynsha naqty sharalar qoldanylylyp jatady, al tasymaldaý erejesin júıeli túrde buzatyn tasymaldaýshylarmen jasalǵan sharttar buzylady.
Bólim bastyǵynyń aıtýynsha, sońǵy úsh jylda tasymaldaýshylardyń sany 13-ten 8 birlikke deıin qysqartyldy. Bul qala ishilik baǵyttar boıynsha qyzmet kórsetetin kásiporyndar aýqymynyń ulǵaıyp, úzdikteriniń turaqtap qalýyna jaǵdaı jasaıdy.
Aǵymdaǵy jyldyń tamyz aıynda Astana qalalyq prokýratýrasy jolaýshylar tasymalymen aınalysatyn uıymdarǵa josparly tekseris júrgizdi. Nátıjesi boıynsha 7 baǵyt boıynsha 5 tasymaldaýshymen shart buzyldy. Búgingi tańda osy baǵyttardaǵy kólikter kemshilikter joıylǵanǵa deıin ýaqytsha paıdalanylyp jatyr.
