Astanadaǵy klınıkalardyń birinde aıaǵymen sýret salatyn bala emdelýde
ASTANA. 16 qańtar. QazAqparat - Astanadaǵy Respýblıkalyq balalardy ońaltý ortalyǵynda tserebraldy sal aýrýyna shaldyqqan 17 jasar Danııar Qasymhan emdelýde.
Bir qyzyǵy, ol ońaltý sharalarynan keıin qolynan góri aıaǵymen jaqsy ıkemge kelgen. Sonyń arqasynda aıaqtarymen jazyp qana qoımaı, qysqa merzim ishinde sýret salý tehnıkasyn meńgerip úlgerdi.
Respýblıkalyq balalardy ońaltý ortalyǵynyń nevrolog-dárigeri Gúlshara Sısenǵalıevanyń aıtýynsha, aıaq-qolynyń sal bolǵanyna qaramastan, Danııardyń oılaý qabileti, sana-sezimi jaqsy damyǵan. «Tipti óz oı-tolǵamdaryn hat-qaǵazǵa túsirgende, jazýynan bir qate taba almaısyz», - deıdi ol.
Danııardyń ózimen suhbattasqanymyzda, ol kompıýterlik baǵdarlamashy bolýdy armandaıtyndyǵyn aıtty. Nelikten bul mamandyqty unattyń dep saýal qoıǵanymyzda, «Amerıkaǵa barǵym keledi», - dep jaýap qatty.
«Bul bala bizde tserebraldy sal aýrýy dıagnozymen jatyr. Reabılıtatsııalyq emdi jyl saıyn alyp turady. Qazirgi ýaqytta denesiniń damý qarqyny jaqsy. Emdik sharalardan keıin, Danııar otyryp, aıaǵymen sýret salýdy úırendi. Endi qolyn jumys jasatýǵa jattyqtyryp jatyrmyz. Negizi bizdiń túpki maqsatymyz osyndaı balalardy qoǵam ómirine beıimdeý bolyp tabylady», - dep atap kórsetti dáriger.
«Danııar sýretti qylqalammen ǵana emes, qaryndashpen jáne aǵash taqtaıshanyń betin kúıdirip, sýret sala alatyn, ámbebap ári daryndy bala. Ózi qazaqı taqyryptaǵy sýretterdi salýdy jaqsy kóredi. Salt attylardy, ulttyq oıyndardy qaǵaz betine túsirgendi unatady», - deıdi onyń klınıkadaǵy eńbek nusqaýshysy Talǵat Jolanov.
Qazirgi ýaqytta aıaǵymen sýret salatyn jas qylqalam sheberi Qaraǵandy oblysy Jezqazǵan qalasynda turady. №13 orta mektepte bilim alýda.
Klınıka basshysy Sholpan Bólekbaevanyń sózinshe, atalmysh ortalyqta 5 jyldyń ishinde respýblıkanyń ár óńirlerinen 18 myńnan astam bala em alyp shyqqan. Jalpy elimizde sal aýrýyna shaldyqqan 48 myńnan astam búldirshin bar.
