Astanadaǵy Kishi Taldykól aýmaǵynda kóshetter egildi
NUR-SULTAN. QazAqparat – Nur-Sultan qalasynda Kishi Taldykóldiń aýmaǵynda aǵash otyrǵyzý aktsııasy ótti. Oǵan qala turǵyndary, eriktiler, ekobelsendiler qatysty, dep habarlaıdy QazAqparat elorda ákimdiginiń resmı saıtyna silteme jasap.
Іs-sharany elordanyń Qorshaǵan ortany qorǵaý jáne tabıǵatty paıdalaný basqarmasy uıymdastyrdy. Maqsaty – Kishi Taldykól aýmaǵyn abattandyrý, qalany kógaldandyrý jáne ekologııalyq mádenıetti qalyptastyrý.
300-den astam japyraqty aǵash (tal, shegirshin) otyrǵyzyldy. Aldaǵy ýaqytta taǵy 300 kóshet egý josparlanǵan.
«Kishi Taldykóldiń aýmaǵyn kógaldandyrý jumystaryn júrgizip jatyrmyz. Birinshi kezeńde 600 danadan astam jasyl jelek otyrǵyzý josparlanǵan. Búgingi tańda aktsııa aıasynda 300-den astam aǵash otyrǵyzyldy, qalǵan ýchaskelerdiń daıyn bolýyna qaraı aıaqtaý josparlanýda», - dep atap ótti Nur-Sultan qalasynyń Qorshaǵan ortany qorǵaý jáne tabıǵatty paıdalaný basqarmasy tabıǵatty paıdalanýdy jáne quqyqty retteý salasyndaǵy memlekettik qyzmetter bóliminiń bas mamany Ýálıhan Qýanyshev.
Málim etilgendeı, egilgen kóshetter ylǵalǵa tózimdi.
Aǵash otyrǵyzýǵa 100-den astam adam qatysty, olar qala turǵyndary, Nur-Sultan qalasynyń jastar saıasaty máseleleri basqarmasynyń «Astana Jastary» jastar resýrstyq ortalyǵynyń volonterleri jáne ekobelsendiler.
Qyrkúıek-qazan aılarynda elordada jyl saıynǵy «Birge – taza Qazaqstan» kúzgi ekologııalyq aılyǵy ótkiziletin bolady.
Qazirgi ýaqytta Kishi Taldykólde ekopark salý josparlanyp otyr. Jobada sý túbin tereńdetý, sý túbin laı jáne basqa da zııandy shógindilerden tazartý, ortasha tereńdikti ulǵaıtý, sý balansyn saqtaý jumystary kózdelgen.
