Astanadaǵy keń kóshelerdiń birine Iordanııanyń burynǵy Koroli Hýseın ben Talaldyń esimi berildi
ASTANA. QazAqparat - Búgin Astanada Iordanııanyń burynǵy Koroli Hýseın ben Talal atyndaǵy kóshe saltanatty túrde ashyldy. Oǵan Astana qalasynyń ákimi Imanǵalı Tasmaǵambetov jáne Amman qalasynyń basshysy Akel Beltadjı qatysty.
«Búgin biz eńseli elordamyzdyń taǵy da bir aıshyqty sátiniń kýási bolyp otyrmyz. Bas shaharymyz Astana qalasyndaǵy keń kóshelerdiń birine Iordanııa koroldiginiń burynǵy basshysy Hýseın bel Talal myrzanyń esimi berilip otyr. Iordanııanyń joǵary mártebeli burynǵy Koroli Hýseın bel Talalmen de, búgingi basshysy Abdolla ІІ ıbn Ál-Hýseınmen de Qazaqstan Prezıdenti Nursultan Nazarbaevtyń joǵary deńgeıdegi kezdesýleri, memleketaralyq kelisimderi búginde óziniń oń jemisin berip keledi. Ózara dostyq peıil, áriptestik ustanym eki el arasyndaǵy san salaly baılanystardyń nátıjeli jalǵasýyna keńinen jol ashty. Sonyń arqasynda uqsastyǵy men uıqasymy kóp eki el halqy búginde saıası-ekonomıkalyq jáne rýhanı úılesimdi ómir súrýde», - dep atap ótti I. Tasmaǵambetov.
Ákimniń aıtýynsha, 2010 jyly maýsym aıynda Amman qalasynda QR Prezıdenti Nursultan Nazarbaevtyń atyna kóshe berilgen bolatyn. Sol aıtýly oqıǵanyń zańdy jalǵasy retinde búgingi shara eki eldiń dostyǵyn odan saıyn nyǵaıta túspek. Amman qalasynyń meri Akel Beltadjı búgingi qýanyshpen jınalǵan qaýymdy quttyqtaı kelip, bul kúnniń ózi úshin erekshe úsh sıpaty bar ekenin basa aıtty. «Búgingi kún úsh sıpatymen erekshelenip tur. Atap aıtsam: ol búgingi is-shara, osy ýaqyt jáne osy meken-jaı. Іs-shara deıtinim, búgin ásem Astananyń úlken kósheleriniń birine Iordanııanyń burynǵy Koroli marqum Hýseın ben Talaldyń esimi berilip jatyr. Al ekinshi jaǵynan osy ýaqyttyń tańdalýy óz kezeginde Iordanııa Hashımıttik Koroldiginiń táýelsizdik kúni, sondaı-aq áskerıler kúni men Asa Mártebeli Iordanııa Koroli Abdýlla ІІ ıbn Ál-Hýseınniń taqqa otyrýy merekelerimen tuspa-tus kelip, ózara úndesip jatqandyǵy erekshe nazar aýdartady. Úshinshisi, meken-jaı deıtinim, bul jer - Qazaqstan Respýblıkasy bizge baýyrlas el, dińgegi tereńde jatqan danyshpan halqymen jáne de eliniń erteńin oılaıtyn El Kóshbasshysymen maqtana alatyn el», - dep atap ótti Amman meri. Aıta keteıik, Hýseın ben Talal kóshesi - buryn №27 kóshe dep atalǵan, jalpyqalalyq mańyzǵa ıe jańa torapty 6 jolaqty kóshe. Ol Esil ózeni sol jaǵalaýynyń ońtústik josparlanǵan aýdanynda ornalasqan jáne Turan, Qabanbaı batyr, Orynbor kóshelerin qıyp ótedi. Bolashaqta Aqmeshit jáne Saýran kóshelerimen de qıylysatyn bolady. Jańa kóshe Jánibek pen Kereı han kóshelerindegi kólik júktemesin azaıtyp, Turan dańǵylyn Qabanbaı batyr jáne Orynbor kóshelerimen túıistirmek. Kóshe qurylysy 2009 jyly bastalǵan. Jalpy uzyndyǵy 2545 m, eni - 22 m.
