Astanadaǵy «Qazmedıa ortalyǵynyń» kınokontsert zalynda «Dala daýysy» halyqaralyq radıofestıvaliniń gala-kontserti ótedi

Gala-kontsert «Qazaqstan» ulttyq arnasyna túsirilip, alda telekórermender nazaryna usynylatyn bolady, dep habarlady Qazaq radıosy.

Qazaq radıosy - qashanda ulttyń rýhyn nasıhattap kele jatqan birden bir arna ekeni ámbege aıan. Sonyń bir parasy - qazaq ánderi, qazaq áýenderi. Іlgeri zamandaǵy saıahatshylar «Qazaq dalasy án salyp turǵandaı» dep tamsansa, tamsanatyndaı ónerimiz bar. Týǵan jerge degen mahabbat, Otanǵa degen ystyq sezimder sharpyǵan ánderimiz qanshama.

Taýdaı bıiktik, teńizdeı tereńdik, daladaı áspetteıtin áýenderimizdi nasıhattaý maqsatynda Qazaq radıosy jyl basynan beri «Dala daýysy» atty halyqaralyq radıofestıval uıymdastyryp keledi. Oǵan qatysqan otandyq jáne alys-jaqyn shet eldegi ánshilerge qazaqtyń dástúrli jáne estradalyq ánderin joǵary deńgeıde oryndaý talaby qoıylǵan. Búginge deıin Qazaq radıosynda, «Shalqar» arnasynda jáne «Astana» radıosynda «Dala daýysy» aıdarymen belgili ánshilerdiń oryndaýyndaǵy ánder ret-retimen berilip keledi.

Radıofestıvalǵa qatysqan 130 oryndaýshyǵa radıotyńdaýshylardyń Internet arqyly bergen daýystary jáne kásibı mýzyka mamandarynyń pikirleri negizinde 50 oryndaýshy ekinshi aınalymǵa ótti. Endi osy 50 oryndaýshynyń ishinen úzdik 25 óner sańlaǵyna 3 atalym boıynsha «Dala daýysy» dep kórkem bezendirilgen arnaıy kádesyılar beriledi. Ondaǵy  atalymdar mynalar: «Úzdik dástúrli oryndaýshy», «Úzdik estrada ánshisi», «Jańa esim».

Qazaq radıosy jyl boıy efırden berilip, tyńdaýshylardyń ystyq yqylasyna bólengen óner sańlaqtarynyń ásem áýenderimen taǵy da sýsyndaǵysy keletin kórermen qaýymdy «Dala daýysy» radıofestıvaliniń gala-kontsertine shaqyrady.