Astanadaǵy Qazirgi zamanǵy óner murajaıynda Jeńistiń 65-jyldyǵyna jáne Keńes Odaǵynyń Batyry B. Momyshulynyń 100 jyldyǵyna arnalǵan kórme ashyldy

ASTANA. Sáýirdiń 28-i. QazAqparat /Gúlden Ramazan/ - Astana qalasyndaǵy Qazirgi zamanǵy óner murajaıynda Uly Otan soǵysyndaǵy Jeńistiń 65-jyldyǵyna jáne Keńes Odaǵynyń Batyry Baýyrjan Momyshulynyń 100 jyldyǵyna arnalǵan «Erlik máńgilik» atty is-sharasynyń ashylýy boldy,

dep habarlaıdy QazAqparat.

Bıyl elimiz Keńes Odaǵynyń Batyry, KSRO Jazýshylar odaǵynyń múshesi, ult maqtanyshy B.Momyshulynyń 100 jyldyq mereıtoıyn toılaýda.

Tarıhı-mádenı qundylyǵy zor kórmege Qazaq KSR ýaqytyndaǵy tanymal sýretshiler - Aısha Ǵalymbaevanyń B.Momyshulyna arnaǵan kartınasy jáne Nıkolaı Gaevtyń 1985 jyly dúnıege kelgen «Panfılovshylar týraly ballada» grafıkalyq serııasyndaǵy - «Artymyzda Máskeý», «Ómir úshin», «Soǵys jyldarynda qaza bolǵan batyrlar úshin» atty týyndylary qoıylǵan.

Soǵys ardagerleri - Karıı Abıtov, Qondybaı Jeksembaev, Alekseı Kamyshnyı, Leonıd Kartýzov, Vasılıı Mýrentsov, Raısa Safonıcheva jáne Margarıta Shmatchenko keshtiń qurmetti qonaǵy boldy.

Sondaı-aq, kelýshilerdiń nazaryna Qazaqstan, Reseı, Ýkraına, Belarýs, Túrikmenstan jáne TMD-ǵa múshe basqa da elderdiń belgili sýretshileri 1943-2010 jyldar aralyǵynda jazǵan 100-den astam eńbekteri, qazirgi zaman óneriniń ártúrli baǵytynda jáne janrynda dúnıege kelgen týyndylary, grafıkalyq better jáne músindik jumystary usynylǵan.

Іs-sharaǵa qatysqan Astana qalasy máslıhatynyń hatshysy Vladımır Redkokashın, UOS ardagerlerin alda kele jatqan merekemen quttyqtap, óziniń tilegin bildirdi.

Kórme maýsym aıynyń sońyna deıin jumys jasaıdy.