Astanadaǵy QazATÝ janynda Konfýtsıı ınstıtýty qurylady (FOTO)
ASTANA. QazAqparat - Búgin Astanadaǵy S. Seıfýllın Qazaq agrotehnıkalyq ýnıversıteti janynda aýyl sharýashylyǵy salasyndaǵy Konfýtsıı ınstıtýtyn qurý týraly memorandýmǵa saltanatty túrde qol qoıyldy.
Atalǵan qujatty QazATÝ rektory men QHR-dyń Sıntszıan agrarlyq ýnıversıtiniń rektory bekitti. Memorandýmǵa qol qoıý rásimi «Bilim men ǵylymda Qazaqstan-Qytaı yntymaqtastyǵy: damýdyń tájirıbesi men bolashaǵy» atty dóńgelek ústel aıasynda ótti.
S.Seıfýllın atyndaǵy QazATÝ rektory Aqylbek Kúrishbaev eki eldiń arasyndaǵy bilim berý men ǵylym salasyndaǵy birlesken bastamalaryna toqtala kele, birlesken qoldanys úshin básekege qabiletti ınnovatsııalar turǵysynda ýnıversıtet strategııalyq jobalardy josparlaǵanyn atap ótti. Bul turǵyda Veterınarııa jáne mal sharýashylyǵy tehnologııasy fakýlteti kampýsynyń bazasynda birlesken veterınarııa zerthanasyn qurý qarastyrylyp otyr.
Sonymen qatar dóńgelek ústel aıasynda tehnıkalyq fakýltette Aýyl sharýashylyǵynyń qazaqstandyq-qytaılyq mehanızatsııa ortalyǵynyń ashylýy ótti.
