Astanadaǵy QazATÝ-da S.Seıfýllındi eske alýǵa arnalǵan kesh ótti

Bul týraly oqý ornynyń baspasóz qyzmetinen málim etti.

Keshke ýnıversıtet rektory Aqylbek Kúrishbaev qatysyp, sóz sóıledi.

Az ǵana ǵumyrynda Qazaq eli men halqyna ólsheýsiz, mol mádenı mura qaldyryp, olardyń damýyna súbeli úles qosqan aqynnyń ómirbaıany men shyǵarmashylyǵynyń qaltarysy mol qatparlarynan syr shertken bul keshke, S.Seıfýllındi taný men dáripteýge úles qosqan belgili qoǵam qaıratkerleri, aqyndar qatysty. Atap aıtqanda, Halyqaralyq «Alash» syılyǵynyń ıegeri, aqyn Serik Turǵynbekuly, L.N. Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Serik Negimov, sákentanýshy, tarıh ǵylymdarynyń doktory, QR Ulttyq muraǵatynyń bas dırektory Marat Ábsemetovtar keldi.

Sondaı-aq keshke Sáken Seıfýllınniń týystary Quralaı Kamılova men Murat Balǵanbaev, sondaı-aq aqyn muralaryn jınaqtaýǵa úles qosqan murajaı qyzmetkerleri, S. Seıfýllın murajaıynyń alǵashqy dırektory Roza Asylbekova, QR Prezıdenttik mádenıet ortalyǵynyń qyzmetkeri Asııa Súleımenova shaqyryldy.
Qazaqstan Respýblıkasynyń eńbek sińirgen ártisi Serik Ospanov pen Sákenniń beınesin somdap júrgen, Q.Qýanyshbaev atyndaǵy qazaq mýzykalyq drama teatrynyń akteri Qanat Júnisov aqynnyń ánderin asqaqtata oryndap, onyń muralaryna degen jastardyń boıyndaǵy súıispenshilikti oıata tústi.  

Іs-shara barysynda gýmanıtarlyq fakýltettiń ujymy «Aqyn rýhymen syrlasý» atty qoıylym kórsetti. Onda Alashtyń ardaqty aqyny urpaq sanasyn ashý men nurly bolashaqty kórsetý úshin aıanbaı kúreskeni, sol úshin jazyqsyz jazalanyp, ólimge kesilse de, óz rýhanı ustanymy men ultyna degen adaldyǵynan bas tartpaǵan órshil qaısarlyǵy kórsetilim jelisi etip alyndy. Oǵan degen búgingi urpaqtyń iltıpaty men qurmeti aıshyqtalǵan qoıylym kópshilik kórermenniń kóńilinen shyqty. Q. Qýanyshbaev atyndaǵy qazaq mýzykalyq drama teatrynyń akteri Qýandyq Qystyqbaev ýnıversıtet sahnasynda stýdenttermen birge óner kórsetip, Sáken beınesin somdady.