Astanadaǵy Qazaqstan-Reseı ýnıversıtetinde qashyqtan bilim berýdiń bolashaǵy talqylanýda
ASTANA. 19 qarasha. QazAqparat /Jasulan Amanbaıuly/ - Búgin Astanadaǵy Qazaqstan-Reseı ýnıversıtetinde (QRÝ) «Úzdiksiz kásibı bilim berý júıesindegi qashyqtan jáne aqparattyq-kommýnıkatsııalyq tehnologııalar» atty VI halyqaralyq konferentsııa ótýde.
QRÝ-niń atqarýshy dırektory Ábdiǵalı Jandyǵulovtyń aıtýynsha, búgingi konferentsııanyń basty maqsaty - aqparattyq-kommýnıkatsııalyq bilim berý tehnologııalarnyń damýy baǵytyndaǵy máselelerdi belgilep, olardy aǵartý salasyna engizýdiń bolashaǵyn aıqyndaý. «Qatysýshylar alystan bilim berý isin uıymdastyrýdyń normatıvtik-quqyqtyq bazasyn jetildirý jáne QR-niń 2020 jylǵa arnalǵan Strategııalyq damý baǵdarlamasy aıasynda kásibı bilim berý sapasyn arttyrý máselelerin talqylaıdy», dep atap kórsetti A. Jandyǵulov.
Onyń sózine qaraǵanda, halyqaralyq konferentsııanyń byltyrǵy jyly qabyldanǵan usynystary sátti iske asyryldy. «Konferentsııa jumysy kásibı bilim berý sapasynyń joǵarylaýyna jaǵymdy áser beretinine, al qashyqtan bilim berý tehnologııalary shalǵaıdaǵy aýdandarda jáne aýyldarda turatyn túlekterdiń aldynda keń múmkindikter ashatyndyǵyna senim bildiremiz», deıdi ýnıversıtet dırektory.
Shara aıasynda Qazaqstan, Reseı jáne Chehııa elderinen kelgen bilim jáne ǵylym mınıstrlikteriniń ókilderi men ǵalymdary birneshe sektsııalyq taqyryptar boıynsha talqylaýlar ótkizedi.
