Astanadaǵy Qazaq handyǵynyń 550 jyldyǵyna arnalǵan saltanat Memleket basshysynyń qatysýymen ótedi

ASTANA. QazAqparat - Qazaq handyǵynyń 550 jyldyǵyna oraı Astanada ótetin saltanat Memleket basshysy Nursultan Nazarbaevtyń qatysýymen ótedi. Bul týraly búgin elimizdiń Syrtqy ister mınıstri Erlan Ydyrysov málim etti.

"Birneshe kúnnen keıin Astanada Memleket basshysynyń jáne ózge de kóptegen sheteldik qonaqtardyń qatysýymen saltanatty sharalar ótedi. Úlken halyqaralyq ǵylymı konferentsııa uıymdastyrylady. 11 qyrkúıek kúni keshke Astananyń jańa Muz saraıynda teatrlandyrylǵan qoıylym josparlanǵan", - dep habarlady E.Ydyrysov.

"Taǵy bir aıdan keıin Qazaq handyǵynyń negizi qalanǵan óńir - ońtústikte, bizdiń kóne qalamyz Tarazda taǵy da úlken toı ótedi, soǵan shaqyramyz. Tarazda 8 qazanda aspan astynda úlken dýman ótkizip, 550 jyl buryn bizdiń kıeli topyraqta bolǵan tarıhı oqıǵalardy eske túsiretindeı bar kúshimizdi salamyz", - dedi Ydyrysov.