Astanadaǵy Qazaq agrotehnıkalyq ýnıversıtetinde «Uly Jeńis qaharmandaryna arnalady...» uranymen kórkemónerpazdar baıqaýy bastaldy
QazATÝ qabyrǵasynda osymen 40-jylǵa jýyq ýaqyt boıyna ótkizilip kele jatqan kórkemónerpazdar baıqaýynyń basty maqsaty - jastardyń boıdaǵy talaptaryn shyńdaý, kúndelikti oqýdan kóńildi sergitip, ustaz ben stýdenttiń arasyn jaqyndata túsý. Bıylǵy fakýltetaralyq doda Uly Jeńistiń 65 jyldyq mereıtoıyna, 1941-1945 jyldarǵy surapyl soǵysqa qatysqan qazaqstandyq jaýyngerlerdiń erlikterin nasıhattaýǵa arnaldy.
Baıqaý erejesi boıynsha qatysýshy 8 fakýltet, ózderi aldyn ala tańdap alǵan UOS-ynyń bir batyry jaıynda barynsha mol maǵlumat berý maqsatynda, onyń maıdan alańyndaǵy erligi týraly shaǵyn teatrlandyrylǵan qoıylym usynýy, jaýyngerge arnalǵan óleńder men óz arnaýlaryn mánerlep oqýy, sol jyldarǵy adamdardyń kóńil-kúılerin án men bımen jetkizip, 15 adamnan kem bolmaıtyn hormen patrıottyq án oryndaýy tıis.
Úsh kúnge sozylatyn dodanyń alǵashqy kúninde óner kórsetken energetıkalyq fakýltet - Reıhstagta Qyzyl týdy alǵashqy bolyp jelbiretken Raqymjan Qoshqarbaevty, sáýlet óneri fakýlteti - mergen qyz Álııa Moldaǵulovany jáne veterınarlyq fakýltet - jazýshy, partızan, polkovnık Qasym Qaısenovty tanystyrdy. Aldaǵy kúnderi ujymdar T.Bıgeldınov, N.Ábdirov, M.Mámetova, 28 panfılovshylar men B.Momyshuly týraly aıtatyn bolady.
Qazylar alqasynyń múshesi Aýǵan soǵysynyń qatysýshysy, otstavkadaǵy polkovnık Aleksandr Gaplıkov: «Uly Jeńistiń 65 jyldyǵyn atap ótýdiń ózi bir úlken mereke. Al aǵa býynnyń erlikteri talaı zaman ótse-daǵy esh umytylmaıtynyn, olardy urpaqtan-urpaqqa nasıhattap, jetkizip otyrý óte mańyzdy», - deıdi.
A.Gaplıkov, baıqaýǵa qatysýshylardyń mol sany, stýdent jastardyń sol kezdegi oqıǵalardy tereń sezine otyryp, ony barynsha áserli etip jetkizýge qushtarlyqtary, olardyń boıynda tereń patrıottyq sezimder jatqandyǵyn kórsetetinin atap ótti.
Baıqaý qorytyndysy boıynsha jeńimpazdar anyqtalyp, baǵaly syılyqtar tartý etiletin bolady.
