Astanadaǵy Qazaq agrotehnıkalyq ýnıversıteti Naýryz meıramyn joǵary deńgeıde atap ótken JOO ataldy
ASTANA. 7 sáýir. QazAqparat /Gúlmıra Álıakparova/ - Astanadaǵy Qazaq agrotehnıkalyq ýnıversıteti Naýryz meıramyn joǵary deńgeıde atap ótken «eń úzdik JOO» ataldy.
Buǵan deıin habarlaǵanymyzdaı, aǵymdaǵy jyldyń 15-22 naýryzy aralyǵynda Astana qalasy ákimdiginiń uıymdastyrýymen qalalyq mekemeler arasynda «Armysyń, áz-Naýryz!» dástúrli baıqaýy ótti.
Astanalyq Tilderdi damytý basqarmasynyń ókili Gúlbadan Túgel bastaǵan qazylar alqasy atalmysh ýaqyt aralyǵynda 10 joǵary oqý ornynda bolyp, Naýryz meıramyna arnalǵan is-sharalardy tamashalady.
Qazylar alqasy baǵalaý kezinde, meıramdy atap ótýdegi halyqtyń shynaıy kóńil-kúıine, oǵan keler býyn - jastardyń kóptep tartylýyna, sahnalyq qoıylymdardan alystap, dýmanǵa kópshiliktiń aralasýyna nazar aýdardy.
Baıqaý ýaqyty aıaqtalǵannan keıin komıssııa músheleriniń otyrysy ótip, jeńimpazdar anyqtaldy. Máselen, baıqaýdyń bas júldesine S.Seıfýllın atyndaǵy Qazaq agrotehnıkalyq ýnıversıteti laıyq dep tanyldy. Odan keıingi oryndarǵa L.Gýmılev atyndaǵy Eýrazııa ulttyq ýnıversıteti men «Astana» medıtsınalyq ýnıversıtetteri ıe boldy.
Aıta keteıik, baıqaý aıasynda sondaı-aq, Naýryz meıramyn eń úzdik atap ótken aýmaqtyq, qurylymdyq jáne medıtsınalyq mekemeler, kolledjder men mektepter, kitaphanalar men balabaqshalar anyqtaldy.
