Astanadaǵy qaıyrymdylyq velojoryǵyna 1,5 myńnan astam adam qatysty
ASTANA. QazAqparat - Búgin Astanada elorda kúnin merekeleý aıasynda «Qaısar kerýen» atty qaıyrymdylyq velojarysy ótti. Bul sporttyq sharaǵa qala ákimi Imanǵalı Tasmaǵambetov jáne qala turǵyndary qatysty. Bul týraly qala ákimdigi apparatynyń baspasóz qyzmetinen habarlandy.
Jalpy qashyqtyǵy 4,6 shaqyrymǵa sozylǵan velojoryq saǵat 10:00-de «Saltanat Saraıynan» bastalyp, onyń máresi «Saryarqa» velotregi alańynda aıaqtaldy. Velojarystyń barlyq baǵdarynda qaýipsizdikti qamtamasyz etý úshin alǵashqy medıtsınalyq kómek kórsetý jáne qan qysymyn ólsheýge arnalǵan beketter qarastyryldy.
«Eń aldymen, barshalaryńyzdy súıikti elordamyzdyń kúnimen quttyqtaımyn. Astana - jastardyń qalasy. Osyǵan búgingi velomarafonǵa kóptep qatysqan jastar sebep bolyp otyr», - dedi I. Tasmaǵambetov.
Aıta keteıik, osy velojoryqqa metsenattar, Olımpıada oıyndary júldegerleri, sondaı-aq otandyq estrada juldyzdary jáne qala qonaqtary qatysty. Budan bólek, «Astana» velokomandasynyń atynan baǵaly lottarmen bássaýda uıymdastyryldy.
Bássaýda men velojoryqtan jınalǵan qarjy múmkindigi shekteýli adamdar arasynda sportty damytýǵa, elordalyq «Qaısar» sport klýbyn qoldaýǵa baǵyttalmaq.
Belgili bolǵandaı, bul sporttyq sharaǵa qatysý úshin 1,5 myńnan astam adam tirkeldi.
