Astanadaǵy kásiporynǵa 3,5 mln teńge qaryzyn qaıtarmaı qashyp júrgen adam Óskemende ustaldy
ShQO polıtsııa departamenti baspasóz qyzmetiniń málimetine súıensek, óńir polıtseılerine Astana qalasynyń jeke sot oryndaýshysynan «Porsche Cayenne» markaly kólikti ustaý týraly qaýly kelip túsken.
Kólik ıesiniń elordadaǵy kásiporynǵa jalpy somasy 3 512 546 teńge mólsherinde qaryzy bolǵan. Alaıda ol sol qaryzdy qaıtarmaı boı tasalap júrgen.
«Óskemen qalasynda «Qyran-12» ekıpajynyń qyzmetkerleri «Sergek-qorǵaý» apparattyq-baǵdarlamalyq kesheniniń kómegimen atalǵan kólikti tapty. 40 jastaǵy júrgizýshige onyń ne sebepti toqtatylǵany túsindirildi. Óz kezeginde er adam bankterdiń biriniń mobıldi qosymshasy arqyly qaryzdyń tolyq somasyn sol jerde tólep tastady», - delingen aqparatta.
Osy rette, departament qyzmetkerleri azamattardy osyndaı jaǵdaılardy boldyrmaý úshin qarjylaı qaryzdaryn ýaqytyly tólep otyrýǵa shaqyrady.