Astanadaǵy kásipqoı boks keshi: Janqosh Turarov «Batyl júrekpen» kezdesedi

NUR-SULTAN. QazAqparat – 18 jeltoqsan kúni Nur-Sultan qalasynda ótetin kásipqoı boks keshinde profırıngte jeńilip kórmegen qazaqstandyq sportshy Janqosh Turarov (24-0, 17KO) óner kórsetedi, dep habarlaıdy QazAqparat.

VKontakte áleýmettik jelisindegi «Qazaqstannyń kásipqoı boksy» paraqshasynda málim etilgendeı, onyń opponenti «Batyl júrek» laqap atymen tanymal, 39 jastaǵy mysyrlyq Abdýmonem Saıd (22-1-1, 11KO) bolady.

J.Turarov úshin bul 2019 jyldan bergi alǵashqy jekpe-jek bolady. Ol kezde boksshymyz Argentına ókili Maýro Maksımılıano Godoıany (35-7-1, 17KO) úshinshi raýndta nokaýtqa jibergen bolatyn.

A.Saıd bolsa buǵan deıingi aıqasyn 2020 jyldyń sońynda óz elinde ótkizgen edi. Kaırde ol óz otandasy Valıd Tavfıkti dıskvalıfıkatsııamen jeńip, birinshi jartylaı orta salmaqtaǵy ulttyq chempıon tıtýlyn jeńip aldy.⠀

Eske salaıyq, 18 jeltoqsan kúni Nur-Sultan qalasynda el Táýelsizdiginiń 30 jyldyǵyna arnalǵan kásipqoı boks keshi ótedi.

Keshtiń basty aıqasy jartylaı orta salmaqtaǵy Danııar Eleýsinov (10-0, 6KO) pen meksıkalyq Dante Hardon (41-7, 25 KO) arasynda belgilendi. Eleýsinov birden eki tıtýl: IBF Inter-Continental nusqasy boıynsha álem chempıony jáne IBO tıtýly úshin qolǵap túıistiretini aıtylǵan edi. Alaıda, keshe D. Hardon qolyn syndyryp alǵany jáne oǵan dárigerler rıngke shyǵýǵa tyıym salyp otyrǵany málim boldy.

Sondaı-aq kesh aıasynda aýyr salmaqtaǵy boksshymyz Ivan Dychko (10-0, 10 KO) reseılik Aleksandr Ýstınovqa (36-5-1, 27 KO) qarsy shyǵady.

Budan bólek, Danııar Eleýsinovtiń inisi Dáýren Eleýsinov (8-1-1, 7 KO), Aıdar Sháribaev (8-1, 7KO), Dáýlet Dáýkenov (9-2, 4KO) óner kórsetetini josparlanǵan.

Profıboks keshi «Habar» telearnasynan kórsetiledi.