Astanadaǵy Qallekı teatrynda «Qyzdar-aı» atty zamanaýı komedııanyń premerasy ótedi
ASTANA. 6 jeltoqsan. QazAqparat - Astanadaǵy Q.Qýanyshbaev atyndaǵy Memlekettik akademııalyq qazaq mýzykalyq drama teatry jeltoqsannyń 12-13 kúnderi, saǵat 18.30-da Qýandyq Shańǵytbaev pen Qanabek Baıseıitovter shyǵarmashylyǵyndaǵy «Beý, qyzdar-aı» atty týyndynyń, zamanaýı úlgide «Qyzdar-aı» dep ózgertilgen komedııasynyń premerasyn ótkizedi.
Bul týraly teatrdyń baspasóz qyzmetinen habarlady.
Atalmysh komedııa «Qallekı» teatrynda 2002 jyly rejısser, Halyq qaharmany Ázirbaıjan Mámbetovtiń sahnalaýymen alǵash ret qoıylǵan edi, araǵa on jyl salyp, jastar arasyndaǵy mahabbat, aýyl men qaladaǵy ómir kórinisterin sýretteıtin shyǵarma sahnaǵa qaıta oraldy.
Jalyndy jastyq. Aıdaı sulý Aısulýdyń ajaryna yntyq jigitter arýdy izdep aýylǵa keledi. Armanynda tek Aısulýdy ańsaǵan «seriler» qaınaǵan eńbekke qalaı aralasyp ketkenderin bilmeı de qalady. Kóp uzamaı árqaısysy armanyndaǵy arýdyń júregine jol tabady. Biraq ol arýlar múlde bular izdegen Aısulý emes. Sonda qalaı? Jaýabyn bilgińiz kelse, spektakldi tamashalańyz. Shym-shytyryq qyzyqty oqıǵalarǵa toly qoıylym áserli ánderge ulasyp, mahabbat hıkaıasynan syr shertedi.
