Astanadaǵy Qallekı teatry «Abylaı hannyń armany» tarıhı dramasyn usynady
ASTANA. QazAqparat - Q.Qýanyshbaev atyndaǵy Memlekettik akademııalyq qazaq mýzykalyq drama teatry aqpannyń 7 juldyzynda, saǵat 18.00-de «Abylaı hannyń armany» atty tarıhı dramasyn Qazaq handyǵynyń 550 jyldyǵyna arnap usynady, dep habarlady teatrdyń baspasóz qyzmeti.
Atalmysh qoıylymdy QR Memlekettik hatshysy G.Ábdiqalyqova bastaǵan memleket jáne qoǵam qaıratkerleri tamashalaıdy, dep kútilýde.
Qazaq handyǵynyń 550 jyldyǵyn toılaý aıasynda «Abylaı hannyń armany» atty tarıhı dramasy azdaǵan óńdeýden ótip, kórermenge qaıta usynylady. Avtory - belgili jazýshy, jýrnalıst, zertteýshi, dramatýrg Dýman Ramazan, rejısseri - Qazaqstannyń eńbek sińirgen qaıratkeri Bolat Uzaqov. Bul D.Ramazan men B.Uzaqov shyǵarmashylyǵyndaǵy ekinshi tarıhı týyndy bolmaq. Buǵan deıin 2010 jyly dramatýrg pen rejısser úndestiginde «Kenesary - Kúnimjan» atty tarıhı drama dúnıege kelip, búgingi tańǵa deıin kórermenniń suranysyna ıe qoıylymnyń biri bolyp tabylady.
«Abylaı hannyń armany» Abylaı hannyń jońǵar tutqynyna túsken kezinen bastalady. Abylaı hannyń qazaq halqyn ómir ótkeleginen qalaı aman-esen alyp shyqqany baıandalady. Eger sol kezde Abylaıhan júrgizgen uly saıasat bolmasa, qazaqtardyń da jońǵarlardyń kebin kıip, jer betinen ult retinde joıylyp ketýi kámil edi!..
Bul shyǵarmada uly hannyń kóshbasshylyq qasıetimen birge, adamı bolmys-bitimi, sarabdal qaıratkerligi, suńǵyla saıasatkerligi, asqan aqyl-parasattylyǵy, erjúrek batyrlyǵy jan-jaqty qyrynan ashyp kórsetiledi.
Abylaı hannyń rolinde «Qasym» telefılminde Qazaqstannyń halyq qaharmany - Qasym Qaısenovtiń, E.Jýasbektiń «Tereń tamyrlar» allegorııalyq dramasynda Elbasy Nursultan Nazarbaev syndy kesek tulǵalardy somdap júrgen talantty akter Qýandyq Qystyqbaev óner kórsetedi.
