Astanadaǵy Qalıbek Qýanyshbaev atyndaǵy qazaq-mýzykalyq drama teatry Almatyǵa gastroldik saparmen keldi
ALMATY. Sáýirdiń 19-y. QazAqparat /Erlik Erjanuly/ - Almatydaǵy Qazaqtyń Muhtar Áýezov atyndaǵy akademııalyq drama teatryna Astanadaǵy Qalıbek Qýanyshbaev atyndaǵy qazaq-mýzykalyq drama teatry gastroldik saparmen keldi,
dep habarlaıdy QazAqparat.
1991 jyly rejısser Jaqyp Omarov negizin qalaǵan Q.Qýanyshbaev atyndaǵy qazaq-mýzykalyq drama teatry 19 jyldyń ishinde birqatar bıikterdi baǵyndyryp úlgerdi. Máselen 1992 jyly Ǵ. Músirepovtiń 90 jyldyǵyna arnalǵan halyqaralyq teatr festıvalinde laýreat, 1996 jyly túrki tildes halyqtardyń "Týǵanlyq" ІІ halyqaralyq festıvalinde júldeger, al 2000 jyly "Mını komedııa" teatrlary blıts festıvalinde 1-shi oryndy ıelendi. Erkin Jýasbek jetekshilik jasaıtyn óner ujymynda qazir 4 - "halyq ártisi", 5 - "QR eńbek sińirgen ártisi", 5 - "QR eńbek sińirgen qaıratkeri", 1- "Mádenıet qaıratkeri", 8 - "Jastar", 2 - "Serper" syılyǵynyń ıegeri bar.
Teatrdyń Almaty qalasyndaǵy gastroldik saparynyń repertýarlyq baǵdarlamasy sáýirdiń 21-25 aralyǵyna josparlanyp otyr. Onda Almaty turǵyndary men qonaqtaryna M. Áýezovtiń "Abaı" men "Qaragóz" (tragedııa), Dj.Patrıktiń "Qymbatty Pamella" (komedııa), Q.Júnisovtiń "Mahabbat melodramasy" (psıhologııalyq drama), A. Tsagarelıdiń "Gamardjoba!", E. Jýasbektiń "Úılený" (mýzykalyq komedııa) jáne M.Ahmanovtyń "Aldardyń aılasy" (ertegi) qoıylymdary usynylmaq.
