Astanadaǵy Q.Qýanyshbaev atyndaǵy Qazaq mýzykalyq drama teatry Qazaqstan teatrlarynyń XVIII respýblıkalyq festıvalinen bas júldemen oraldy

Uly Otan soǵysyndaǵy Jeńistiń 65 jyldyǵy men B.Momyshulynyń 100 jyldyǵyna arnalǵan festıval QR Mádenıet mınıstrliginiń uıymdastyrýymen, Jambyl oblysy ákimdiginiń qoldaýymen qyrkúıektiń 20-27-si kúnderi aralyǵynda ótti.

Festıval otandyq teatr repertýarlarynyń ıdeıalyq-kórkemdik deńgeıin arttyrý, UOS batyrlaryna arnalǵan taqyrypta jańa sahnalyq qoıylymdar týdyrý men jastardy patrıottyq tárbıege baýlyp, baǵyt-baǵdar berýge negizdelgen. Sharanyń basty maqsaty - Otan qorǵaýshylar beınesin teatr óneri tásilderimen somdaý, teatr ujymdarynyń shyǵarmashylyq izdenisterin yntalandyrý.

Festıvalǵa respýblıkamyzdyń úzdik dep tanylǵan barlyǵy 9 teatry qatysty. Atap aıtqanda, Astanadaǵy Q.Qýanyshbaev atyndaǵy Qazaq mýzykalyq drama teatry, Almaty qalasynyń Memlekettik nemis drama teatry, «Aqsaraı» mıýzıkl teatry, Ǵ.Músirepov atyndaǵy Qazaq memlekettik akademııalyq balalar men jasóspirimder teatry, Memlekettik respýblıkalyq koreı mýzykalyq komedııa teatry, sondaı-aq Stanıslavskıı atyndaǵy Qaraǵandy oblystyq orys drama teatry, «Darıǵa-aı» Shyǵys Qazaqstan oblystyq jastar teatry, S.Qojamqulov atyndaǵy Jezqazǵan qalalyq mýzykalyq-drama teatry, M.Gorkıı atyndaǵy Memlekettik orys drama teatry (Astana).

Festıval qorytyndysynda qatysýshylar «Eń úzdik er adam beınesi», «Eń úzdik stsenografııalyq sheshim», «Eń úzdik áıel beınesi» jáne t.b. atalymdar boıynsha marapattaldy. Al bas júldeni elordalyq Q.Qýanyshbaev atyndaǵy Qazaq mýzykalyq drama teatry jeńip aldy.

Teatrdyń baspasóz qyzmetinen málim etkendeı, teatr ujymy festıvalǵa A.Dýdarevtiń «Kesh» qoıylymyn alyp bardy.

«Máskeýden arnaıy shaqyrylǵan teatr synshysy Reseı teatr óneri akademııasynyń (GITIS) professory Anna Stepanova Q.Qýanyshbaev atyndaǵy Qazaq mýzykalyq drama teatry qoıǵan qoıylymdy erekshe atap ótip, rejısser men akterlerge rızashylyǵyn bildirdi. Spektakldiń qoıýshy rejıssery QR Eńbek sińirgen qaıratker Bolat Uzaqov. Al rolderdi QR Eńbek sińirgen ártisi Rymkesh Omarhanova men QR Eńbek sińirgen qaıratkeri Bekbolat Qurmanǵojaev somdady», - delingen baspasóz qyzmetinen.