Astanadaǵy IT-ýnıversıtet tórt baǵytta mamandar daıarlaıdy
IT jáne jańa texnologııalar departamentiniń bas menedjeri Zamır Ibraevtyń aıtýynsha, IT-ýnıversıtet S-1 degen Halyqaralyq pavılonda ornalasady. Qaıta qurý jumystary aıasynda onyń aýdany 24 myń sharshy metrden 35 myń sharshy metrge deıin keńeıtiledi. Barlyq sharalar aǵymdaǵy jyly 1 qyrkúıekke deıin aıaqtalady degen jospar bar.
«Jańa ýnıversıtet aqparattyq texnologııalar salasyndaǵy álemniń úzdik joǵary oqý oryndarymen birlesip ashylady. Ol jerde maman daıarlaýdyń eki baǵdarlamasy bolady. Birinishisi - jedel ınnovatsııalyq baǵdarlama, al ekinshisi - qaıta daıarlaý baǵdarlamasy. IT-ýnıversıtet tórt mekteptiń negizinde jumys isteıdi. Olar - kıberqaýipsizdik (cyber security), kompıýterlik ǵylym (computer science), ındýstrıaldyq ınjınırıng jáne IT menedjment», - dedi Z.Ibraev jýrnalısterge bergen suxbatynda.
Onyń sózine qaraǵanda, oqytýǵa sheteldik mamandar da tartylady. Ázirshe, oqýdyń aqysy jáne taǵy basqa máseleler pysyqtalyp jatyr.
«Endi, ol ýnıversıtet memlekettik joǵary oqý orny bolady. Sondyqtan Bilim jáne ǵylym mınıstrligi ózi anyqtaıdy. Granttar bólinedi. Basqa ýnıversıtetter sııaqty oqytatyn shyǵar. Bastapqyda 1 myńǵa deıin adam qabyldanady. Odan keıin stýdentterdiń sany 2 500-ge deıin artady degen jospar bar. Sebebi ǵımarattyń syıymdylyǵy soǵan jetedi», - dep atap kórsetti Z.Ibraev.
Aıta keteıik, ótken jyly Astana Hub halyqaralyq tehnoparkiniń ashylý rásimine qatysqan QR Prezıdenti Nursultan Nazarbaev jańa IT-ýnıversıtettiń ashylýy jaıynda aıtqan bolatyn.
«Qazirgi kezde Nazarbaev ýnıversıteti, IT-tehnologııalar parki sııaqty aqparattyq klasterler bar. Búgin maǵan EKSPO negizinde jańa IT-ýnıversıtettiń ashylatyny jaıynda habarlady. Atalǵan joǵary oqý orny 2019 jyly 1 qyrkúıekten bastap iske qosylady», - dedi N.Nazarabaev.