Astanadaǵy IRONMAN jarysy TMD boıynsha alǵash ret uıymdastyrylady
ASTANA. QazAqparat - IRONMAN 70.3 Astana jarysyna 40-qa jýyq eldiń sportshylary kelýi kerek, dep xabarlaıdy QazAqparat tilshisi.
Qazaqstan trıatlon federatsııasynyń vıtse-prezıdenti Aıdyn Raxymbaevtyń aıtýynsha, Astanadaǵy jarysqa 39 eldiń sportshylary keledi degen jospar bar.
«IRONMAN 70.3 Astana-ǵa kez kelgen adam qatysa alady. Kásibı sportshy bolsyn, áýesqoı bolsyn, áıelder de, erkekter de, barlyǵy birdeı óz kúshterin synaı alady. Jarysty ótkizý kezinde barlyq xalyqaralyq talaptar saqtalyp, sportshylarǵa da, jankúıerlerge de qajetti jaǵdaı jasalady. Osyǵan baılanysty jarystyń marshrýty, qonaqtarǵa arnalǵan oıyn-saýyq baǵdarlamasy jáne taǵy basqa máseleler eskeriledi. Jarysty uıymdastyrý sharalaryna 500 erikti tartylady. Olardyń barlyǵy EKSPO-2017 Halyqaralyq kórmesi kezinde biraz tájrıbe jınady», - deıdi A.Raxymbaev.
Onyń aıtýynsha, qazirdiń ózinde bir myńnan astam qatysýshy tirkelip úlgerdi. Olardyń teń jartysy - qazaqstandyqtar. Al Astanadaǵy birneshe qonaq úı IRONMAN 70.3 Astana qatysýshylaryna arnaıy baǵalardy usynýǵa daıyn. Barlyq otelder qyzmet kórsetý sapasy men jarys oryndaryna jaqyn ornalasýyna qaraı irikteldi.
Aıta keteıik, IRONMAN 70.3 Astana maýsym aıynda ótedi. Jarys úsh kezeńnen turady. Olar - júzý (1,9 shaqyrym), velojarys (90 shaqyrym) jáne júgirý (21,1 shaqyrym). Osylaısha, jarystyń jalpy uzaqtyǵy 113 shaqyrymdy quraıdy.
