Astanadaǵy iri qurylys kompanııalary kásipodaqtarsyz jumys isteýde
ASTANA. QazAqparat - Astanadaǵy qurylys kompanııalarynyń basshylary ujymdyq sharttar men kelisimder boıynsha mindettemelerdiń oryndalýyn qamtamasyz etpeı otyr. Bul týraly búgin Ortalyq kommýnıkatsııalar qyzmetindegi baspasóz máslıhatynda Qurylys kesheni jáne turǵyn úı-kommýnaldyq sharýashylyǵy jumysshylary salalyq kásipodaǵy tóraǵasynyń orynbasary Tileýles Madııarova málim etti.
Onyń aıtýynsha, búginde elordada qurylys uıymdarynyń basym bóliginde kásipodaqtar qurylmaǵan. Іri qurylys nysandarynda daýly jaǵdaılardyń negizgi sebepteri eńbek shartynsyz jumysshylardy tartý, eńbekaqyny ýaqtyly tólemeý, lıtsenzııasy joq qurylys brıgadalaryn jumysqa tartý, atqarylǵan jumys kólemi úshin tólem jasaýdaǵy talas, eńbek erejelerin buzý sekildi oqıǵalarǵa qatysty bolýda.
T. Madııarovanyń sózine qaraǵanda, ótken jyly Astanada tirkelgen 115 jazataıym oqıǵanyń 90 paıyzy qurylys uıymdaryna tıesili.
Atap aıtqanda, tájirıbe kórsetip otyrǵandaı, eńbekti qorǵaý boıynsha qoǵamdyq ınspektorlary saılanǵan kásipodaqtary bar uıymdarda jaraqat alý deńgeıi tómen jáne eńbek zańnamasyn buzý faktileri bolmaıdy. Sonymen qatar osyndaı kompanııalarda joǵary eńbek ónimdiligi men eńbek tártibi saqtalady.
«Búginde qalalyq úshjaqty komıssııa tarapynan áleýmettik seriktestikti damytý, Astanadaǵy qurylys kompanııalaryndaǵy jumys berýshiler men jumysshylar arasynda teńgerimdi saqtaý boıynsha tıisti sharalar atqarylýda. Qazirgi kezde ákimdikpen birlese salalyq kásipodaq qala boıynsha Astana qalasy qurylys jumysshylarynyń kásipodaǵyn qurýda. Alaıda, ókinishke qaraı kóptegen iri kompanııalar - BI-holdıng, Bazıs-A, Sembol Insaat, Highvill ózderinde kásipodaqtardy qurǵylary kelmeıdi»,-dedi ol.
