Astanadaǵy ınjenerdiń ónertabysyna Amerıka qyzyǵýshylyq tanytyp otyr
ASTANA. QazAqparat - Astanalyq ınjenerdiń ónertabysyna AQSh-ta úlken tapsyrys berildi. Bul týraly Texnologııalyq damý boıynsha ulttyq agenttiktiń baspasóz qyzmeti xabarlady.
Agenttiktiń xabarlaýynsha, Evgenıı Şerbatovtyń "Mangýst" atty ónertabysy Technation baıqaýynda jeńiske jetkennen keıin, Qazaqstanda ǵana emes, shetelde de úlken qyzyǵýshylyqqa ıe boldy.
"Qazirgi ýaqytta San-Frantsıskodan Aýtıst balalar qaýymdastyǵynan úlken tapsyrys kelip tústi. Sonymen qatar Qazaqstanda "Qazposhta" AQ ózderiniń xattaryn baqylaý maqsatynda satyp alýdy josparlaýda. Otandyq GPS-júıe elde ǵana emes, xalyqaralyq naryqta da biregeı bolyp tabylady", - delingen xabarlamada.
Keltirilgen derekter boıynsha, joba quny 18,8 mln. teńgeni quraıdy. Onyń 90%-yn agenttik qarjylandyrǵan.
Barlyǵy Evgenıı Şerbatovtyń qıyn ómirlik jaǵdaıǵa tap bolýynan - balasynyń joǵalyp ketýinen keıin bastaldy. Sol kezde joba avtory atalmysh qurylǵyny oılap tabady. Sonymen qatar joba avtorynyń aıtýynsha, trekerdi satyp alýǵa 600-ge tarta ata-ana tapsyrys bergen.
«Mangýst» trekeri synbaıdy, sý astynda isteı beredi. Qýaty 20 kúnge deıin jetedi ári qaýipsiz. Mobıldi baılanysy bar álemniń kez kelgen jerinde jumys jasaı beredi. Asa joǵary dáldigimen erekshelenedi. Tipti saýda úılerinde, jertólelerde asa dáldikpen sıgnal jibere alady. Onyń ústine ony qoldaný óte ońaı jáne múmkindigi shekteýli adamdarǵa yńǵaıly. Osy qasıetteriniń arqasynda ol álemdegi basqa balamalardan oq boıy ozyq tur.
"Basqa trekerlerdiń akkýmýlıatorlary tez otyrady, soqqy kezinde synyp qalady. Balalar úshin onyń myqtylyǵy mańyzdy, sebebi balalar júgiredi, qulap qalýy múmkin. Trekermen birge tolyqfýnktsıonaldy qosymsha bar, ol trekerdiń qaıda ornalasqandyǵyn tabýǵa múmkindik beredi", - dep jazady agenttiktiń baspasóz qyzmeti.
