Astanadaǵy HQKO-da Úleskerlerdi qoldaý ortalyǵy ashyldy
Astana qalasynyń prokýrory Bolat Dembaev ortalyqtyń ashylý saltanatynda sóz sóılep, búgin resmı túrde jańa ortalyq jumysyn bastaıtynyn málim etti.
«Úleskerlerdiń máselesi - qoǵamdaǵy eń ózekti túıtkilderdiń biri. Ár túrli vedomstvodaǵy áriptestermen aqyldasa kele aqparattyq ári keńes berý baǵytyndaǵy ortalyqty ashý týraly sheshimge keldik. Bizdiń maqsat - úleskerlerge kómek kórsetý. Qurylysy 90 protsent aıaqtalǵan úıler bar, 2-3 jyl úılerinde turyp jatqanymen baspana qujatynsyz júrgender de barshylyq. Qujatsyz balany mektepke nemese balabaqshaǵa aparý qanshalyqty qıyn ekenin oılaı berińiz. Olar jóndi medıtsınalyq kómek te ala almaıdy. Osy sebepti, jańa ortalyq arqyly ár jaǵdaı boıynsha sharalar qoldanbaqpyz», - deıdi Bolat Dembaev.
Qala prokýrorynyń aıtýynsha, Astanada jaýapsyz qurylys júrgizýsherdiń saldarynan 14 myńǵa jýyq adam zardap shekken. Shaharda qazirgi ýaqytta 52 problemalyq nysan bar. Jyl basynan beri Bolat Dembaev osyndaı jaǵdaıǵa tap bolǵan 400-ge jýyq úleskermen jeke kezdesý ótkizgendigin aıta kele jańa ortalyqtyń jumysyn BAQ ókilderine tanystyrdy.
Máselesi sheshilmegen úleskerlerge jańa ortalyqta ishki ister departamentiniń, prokýratýranyń, memlekettik kirister departamentiniń, jer qatynastary basqarmasynyń, sáýlet jáne qurylys basqarmasynyń, ádilet departamentiniń ókilderi men medıatorlar qyzmet kórsetedi. Ortalyq aptasyna úsh kún: dúısenbi, sársenbi jáne juma kúnderi saǵat 09:00-12:00 aralyǵynda jumys atqaratyn bolady. Yńǵaıly bolý úshin Reception bóligi máselesi bar úleskerlerdi birden ortalyqqa joldaıdy. Qajettilik týyndaǵan jaǵdaıda jumys ýaqytyn uzartylmaq. Sondaı-aq, suranys artqan jaǵdaıda qalanyń ózge de HQKO-larynda osyndaı ortalyqty ashý kózdelip otyr.
Óz kezeginde qala ákiminiń orynbasary Sergeı Horoshın jańa ortalyq arqyly Astanada úleskerlerge qatysty túıtkilder azaıatynyna senim bildirdi.