Astanadaǵy halyqaralyq sotta brıtandyq sýdıalar jumys isteıtin bolady
ASTANA. QazAqparat - «Astana» halyqaralyq qarjy ortalyǵynyń arbıtraj sotynda brıtandyq sýdıalar jumys isteıtin bolady. Bul týraly búgin QazAqparat tilshisine «Astana» halyqaralyq qarjy ortalyǵynyń basqarýshy dırektory Saıasat Nurbek málim etti.
Búgin Joǵarǵy sot pen «Astana» halyqaralyq qarjy ortalyǵy qazaqstandyq sýdıalardy Londonda kásibı tájirıbeden ótkizý baǵdarlamasymen tanystyrdy. 2016 jyly jeltoqsanda mamandardy shetelde daıyndyqtan ótkizý respýblıkalyq komıssııasy Joǵarǵy sot pen «Astana» halyqaralyq qarjy ortalyǵynyń qyzmetkerlerine Londonda Law Society baǵdarlamasy boıynsha tájirıbeden ótýge múmkindik beretin «Bolashaq» prezıdenttik baǵdarlamasynyń 15 stıpendııasyn taǵaıyndady.
«Birinshi kezeńde atalmysh halyqaralyq sotta qazaqstandyq sýdıalar bolmaıdy. Tek brıtandyq sýdıalar qyzmet etedi. Ázirge maman sany eki-úsh adamnan aspaıtyn bolady. Sebebi bastapqyda ister, sot sheshimderi kóp bolmaıdy. Bul baǵdarlama ózimizdiń sýdıalardan quralǵan negizgi pýldy jasaqtaýǵa baǵyttalyp otyr. Bul óte kúrdeli jumys, sebebi brıtandyq quqyq óte erekshe keledi. Sýdıalardy daıyndaýdyń naqty bir júıesi joq deýge de bolady. Oǵan azamattyq, qylmystyq ister boıynsha jumys istep jatqan, eń myqty, eń tájirıbeli, eń «taza» zańgerler alynady. Olar keıin sýdıalyqqa alynady. Sondyqtan ózge memleketterdiń sýdıalaryna táýeldi bolmaýymyz úshin, osy baǵdarlamany bastaýymyz kerek, neǵurlym erte bastasaq, soǵurlym jaqsy bolady», - dedi Saıasat Nurbek.
Otandyq mamandar Londonda alty aılyq tájirıbeden ótpek. Onda akademııalyq jáne tájirıbelik kezeńder enip otyr. 10 apta teorııa meńgergennen keıin, olar Ulybrıtanııanyń eń úzdik zańgerlik jáne advokattyq kantorlarynda 5 aptalyq tájirıbede shyńdalady.
Eske sala keteıik, Ult josparynda QR Prezıdenti Nursultan Nazarbaev Astanada ınvestıtsııalyq máselelerdi sheshetin halyqaralyq arbıtraj ortalyǵyn qurýdy tapsyrǵan bolatyn. Tek aǵylshyn tilinde is júrgizetin qarjylyq sotta anglosaksondyq quqyq júıesi qoldanylady.
«Qazirgi ýaqytta halyqaralyq saýda men qarjy júıesiniń tili - aǵylshyn tili. Álemde kelisimsharttardyń 80 paıyzy brıtandyq quqyq aıasynda júrgiziledi. Investorlar óz múddeleriniń eń senimdi quqyq júıesi negizinde qorǵalǵandyǵyn bilýi úshin osyndaı sharalarǵa barýǵa mindettimiz», - dedi ol.
