Astanadaǵy halyqaralyq áýejaı avtoturaǵynda tarıfter ózgerdi
ASTANA. QazAqparat - Astanadaǵy «Nursultan Nazarbaev» halyqaralyq áýejaıynyń avtoturaǵynda tólem tarıfteri ózgerdi, dep habarlaıdy QazAqparat tilshisi.
Búgingi baspasóz máslıhatynda atap ótilgendeı, áýejaı avtoturaǵynda jolaýshylardy otyrǵyzý men túsirýge arnalǵan arnaıy jol jelisi ashyldy. Jáne onyń ortaq avtoturaqtan bólek óz tarıfi engizildi.
«Tarıfterdi qalyptastyrý kezinde halyqaralyq tájirıbe eskerildi. Avtoturaq aımaǵynyń arnaıy jol jelisinde ruqsat etilgen tegin turý ýaqyty 0-den 15 mınýtqa deıin. Eýropa elderinde eń az tegin turý ýaqyty qoldanylady nemese tegin ýaqyt degen bolmaıdy. TMD elderinde tegin turý ýaqyty kópteý», - dedi «Astana LRT» kompanııasynyń Basqarma tóraǵasy Bekmyrza Igenberdınov.
«Nursultan Nazarbaev» halyqaralyq áýejaıynda jańadan ashylǵan arnaıy jol jelisiniń tarıfteri kelesideı: turaqta turýdyń alǵashqy 15 mınýty - tegin. Ýaqyt sheginen asyp ketken jaǵdaıda, avtojúrgizýshi árbir kelesi saǵaty úshin 1000 teńgeden tóleıdi. Jol jelisi 2018 jyly 21 shildeden bastap jumys isteı bastaıdy.
Arnaıy jol jelisine Qabanbaı batyr dańǵylymen 6 shlagbaým arqyly kirýge bolady. Shyǵar tusta 5 shlagbaým bar. Avtoturaq aqysyn tóleýdi jeńildetý úshin arnaıy jol jelisinen shyǵar jerde 3 parkomat qoıylǵan. Taǵy 2 parkomat T1 termınalynda jáne T2 termınaly janynda ornatylǵan.
Aıta keteıik, áýejaıdyń ortaq avtoturaǵynda turý tarıfteri de ózgerdi. Eger buryn alǵashqy 30 mınýtqa toqtaý tegin bolsa, qazir bul jeńildik alynyp tastaldy. ıAǵnı kólik ıesi turaqqa kirgen sátten bastap 10 saǵatqa deıin saǵatyna 100 teńge tóleıtin bolady. 10-shy saǵattan bastap, 24 saǵatqa deıin - 1000 teńge. Árbir kelesi táýligi - 500 teńge.
Engiziletin jańalyqtar kólik júktemesin tıimdi basqarýǵa, avtoturaq keńistigin paıdalanýdy ońtaılandyrýǵa jáne zańsyz tasymaldaýshylarmen nátıjeli kúresýge múmkindik beredi dep kútilýde.
